चितवन । चितवनको भरतपुर महानगरपालिका–१६ फुर्तीचोकमा ईभी कारको ठक्करबाट एक महिलाको मृत्यु भएको छ भने दुई जना घाइते भएका छन् ।
शुक्रबार बिहान करिब ९ बजे फुर्तीचोकबाट नवीनचोकतर्फ जाँदै गरेको बा.प्र.०१–०३४ च ९२२१ नम्बरको ईभी कारले पैदलयात्रीलाई ठक्कर दिएको हो ।
दुर्घटनामा भरतपुर महानगरपालिका–१५ निवासी ३० वर्षीया पार्वती भुजेल गम्भीर घाइते भएकी थिइन् । उनलाई तत्काल उपचारका लागि भरतपुर सरकारी अस्पताल लगिएको थियो । तर, उपचारकै क्रममा बिहान ९ः५४ बजे चिकित्सकले उनलाई मृत घोषणा गरेका थिए ।
दुर्घटनामा अन्य दुई जना पैदलयात्रीसमेत सामान्य घाइते भएका छन् । उनीहरूको नयाँ मेडिकल कलेज, भरतपुरमा उपचार भइरहेको छ ।
दुर्घटनापछि प्रहरीले कार र चालक भरतपुर महानगरपालिका–१६ फुर्तीचोक निवासी ३३ वर्षीय मनोज पौडेललाई नियन्त्रणमा लिएको छ ।
घटनाका सम्बन्धमा थप अनुसन्धान भइरहेको प्रहरीले जनाएको छ ।
