काठमाडौं । काठमाडौंको कोटेश्वरस्थित एक गेस्ट हाउसबाट लागूऔषध खैरो हेरोइन र नगदसहित चार जना पक्राउ परेका छन्।
लागूऔषध नियन्त्रण ब्युरो कोटेश्वरबाट खटिएको प्रहरी टोलीले काठमाडौं महानगरपालिका–९ तिलगंगास्थित गेस्ट हाउसमा कोठा बुक गरी बसेका व्यक्तिहरूलाई लागूऔषध खैरो हेरोइन बिक्री गरिरहेको अवस्थामा पक्राउ गरेको हो।
प्रहरीका अनुसार पक्राउ पर्नेमा सिरहाको कल्याणपुर नगरपालिका–२ का २० वर्षीय भरोस मुखिया, २६ वर्षीय धनिकलाल मुखिया, २६ वर्षीय पवन मुखिया र ३६ वर्षीय महमद सजाबुल शेष रहेका छन्।
उनीहरूको साथबाट ३४ ग्राम लागूऔषध खैरो हेरोइन र नगद पाँच लाख ८० हजार रुपैयाँ बरामद गरिएको लागूऔषध नियन्त्रण ब्युरोले जनाएको छ।
गेस्ट हाउसमा बसेर लागूऔषध खरिद–बिक्री गरिरहेको सूचनाका आधारमा प्रहरीले निगरानी तथा अनुसन्धान अघि बढाएको थियो। पक्राउ परेका चारै जनामाथि थप अनुसन्धान भइरहेको ब्युरोले जनाएको छ।
लागूऔषध नियन्त्रण ऐन, २०३३ मा भएको सजायसम्बन्धी व्यवस्थाअनुसार २५ ग्रामदेखि १०० ग्रामसम्म खैरो हेरोइन कारोबार गरेको कसुरमा १० देखि १५ वर्षसम्म कैद र ७५ हजारदेखि दुई लाख रुपैयाँसम्म जरिवाना हुन सक्ने कानुनी व्यवस्था रहेको ब्युरोले जनाएको छ।
प्रहरीले लागूऔषधको अवैध कारोबार नियन्त्रण गर्न निगरानी र अनुसन्धानलाई तीव्र बनाएको जनाएको छ।
