बझाङ । बझाङमा ३ किलो २६५ ग्राम चरेशसहित दुई जना पक्राउ परेका छन्। जिल्लाको बुंगल नगरपालिका–४, बिजगडा बजारस्थित जनक कार्कीको घरबाट प्रहरीले उक्त परिमाणको चरेश बरामद गरेको हो।
जिल्ला प्रहरी कार्यालय बझाङ र अस्थायी प्रहरी पोस्ट बिजगडाबाट खटिएको संयुक्त गस्ती टोलीले कार्कीको घरमा जाँच गर्ने क्रममा चरेश फेला पारेको प्रहरीले जनाएको छ।
प्रहरीका अनुसार घरको कोठाभित्र हरियो झोलामा सेतो कपडाले लुकाइछिपाइ राखिएको अवस्थामा ३ किलो २६५ ग्राम चरेश बरामद गरिएको हो।
चरेश कारोबारमा संलग्न रहेको आरोपमा प्रहरीले बुंगल नगरपालिका–४ का ४३ वर्षीय जनक कार्की र बुंगल नगरपालिका–६ का ५७ वर्षीय जितबहादुर सिंहलाई नियन्त्रणमा लिएको छ।
पक्राउ परेका दुवै जनालाई जिल्ला प्रहरी कार्यालय बझाङमा राखिएको छ। उनीहरूमाथि चरेशको स्रोत, सम्भावित कारोबार तथा घटनामा अन्य व्यक्तिको संलग्नताबारे थप अनुसन्धान भइरहेको प्रहरीले जनाएको छ।
लागुऔषध नियन्त्रण तथा अवैध कारोबार रोकथामका लागि प्रहरीले निगरानी र अनुसन्धानलाई निरन्तरता दिँदै आएको छ। पक्राउ परेका व्यक्तिमाथि अनुसन्धान पूरा भएपछि प्रचलित कानुनअनुसार आवश्यक प्रक्रिया अघि बढाइनेछ।
