चितवन । चितवनको इच्छाकामना गाउँपालिका–६ स्थित प्रसिद्ध जलबिरे (लामो) झरना अवलोकन गरेर फर्किने क्रममा कार दुर्घटना हुँदा एक भारतीय नागरिकको मृत्यु भएको छ।
आज दिउँसो करिब २ः३० बजे डब्लुबी ०२ एपी ३४५८ नम्बरको कार अनियन्त्रित भई झरना नजिकैको खोलामा खसेको थियो।
दुर्घटनामा भारतको पश्चिम बंगालस्थित कालिम्पोङ निवासी ४१ वर्षीय सायन्तन गायेनको घटनास्थलमै मृत्यु भएको जिल्ला प्रहरी कार्यालय चितवनले जनाएको छ।
जिल्ला प्रहरी कार्यालय चितवनका सूचना अधिकारी चन्द्रभुसन यादवका अनुसार मृतकको पहिचान साथमा भेटिएको राहदानीका आधारमा खुलेको हो।
प्रारम्भिक जानकारीअनुसार दुर्घटनाका बेला कारमा चालक गायेन मात्रै सवार थिए। सडकबाट अनियन्त्रित भएको कार भित्तो वा डिलबाट सिधै खोलामा खसेको अनुमान गरिएको छ।
घटनास्थलमा पुगेको प्रहरी टोलीले शव परीक्षणका लागि पठाएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।
