काठमाडौँ । प्रधानमन्त्री वालेन्द्र शाह र भारतका विदेश सचिव विक्रम मिश्रीबीच आज शिष्टाचार भेटवार्ता हुँदैछ।
प्रधानमन्त्री तथा मन्त्रिपरिषद्को कार्यालयमा दिउँसो १२ बजे हुने भेटमा नेपाल–भारत सम्बन्ध तथा द्विपक्षीय हितका विविध विषयमा छलफल हुने परराष्ट्र मन्त्रालयले जनाएको छ।
नेपालको दुईदिने औपचारिक भ्रमणमा रहनुभएका भारतीय विदेश सचिव मिश्री बुधबार काठमाडौँ आइपुगेका थिए। उनले बुधबार नै परराष्ट्र सचिव अमृतबहादुर राईसँग प्रतिनिधिमण्डलस्तरीय द्विपक्षीय बैठक गरेका थिए।
भ्रमणका क्रममा मिश्रीले अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, ऊर्जा, जलस्रोत तथा सिँचाइमन्त्री विराजभक्त श्रेष्ठ र पूर्वाधारमन्त्री सुनिल लम्सालसँग छुट्टाछुट्टै शिष्टाचार भेटवार्ता गरेका थिए।
नेपाल भ्रमण सम्पन्न गरी विदेश सचिव मिश्री आजै काठमाडौँबाट नयाँदिल्ली प्रस्थान गर्ने कार्यक्रम रहेको छ।
