सत्ता गठबन्धनले शनिबार दिउँसो भरतपुरमा चुनावी आमसभा आयोजना गर्दा कांग्रेस समर्थक युवाहरूको एउटा समूहले र्याली गर्दै सभास्थलमा पुगेर नाराबाजी गरे । उनीहरूको माग थियो, ‘गठबन्धनका उम्मेदवारहरूलाई विजयी गराउने वातावरणका लागि विकास कोइरालाको कारबाही फुकुवा गर ।’
कोइराला झन्डै ९ वर्षअघि कारबाहीमा परेका पार्टीका पूर्वजिल्ला सभापति हुन् । प्रतिनिधिसभा सदस्यतर्फ ३ निर्वाचन क्षेत्र रहेको चितवनमा सत्तारूढ गठबन्धनबाट कांग्रेसले चितवन–१ र २ मा क्रमशः विश्वनाथ पौडेल र उमेश श्रेष्ठलाई उठाएको छ ।
चितवन–३ मा माओवादी केन्द्रका उम्मेदवार भोजराज अधिकारी चुनावी मैदानमा छन् । उम्मेदवारी चयन प्रक्रिया र मनोनयन दर्तासँगै चितवन कांग्रेसमा देखा परेको असन्तुष्टि आमसभासम्मै पोखिएको छ ।
सभामा भाषण गर्ने क्रममा उम्मेदवारहरूको चर्चा चल्दा प्रधानमन्त्री तथा कांग्रेस सभापति शेरबहादुर देउवाले चितवन–२ का उम्मेदवार उमेश श्रेष्ठको प्रशंसा अरूको भन्दा बढी नै गरे । विकास कोइरालाको प्रभाव रहेको क्षेत्र पनि यही हो । कोइरालाका समर्थकको मागप्रति सभापति देउवाको टिप्पणी थियो, ‘पुरानो कुरा परेछ । मलाई जानकारी पनि थिएन । कारबाही फुकुवा हुन्छ, किन नहुने तर पार्टीका उम्मेदवार जिताउनुस्, फुकुवा हुन्छ ।’
कोइरालाले यसअघि नारायणगढमा चियापान राखेर समर्थकको ठूलो जमघट गरेका थिए । चितवन–१ का कांग्रेस उम्मेदवार पौडेल पनि देउवानिकट मानिन्छन् । उक्त क्षेत्रमा कांग्रेसका पुराना नेता राजेन्द्र बुर्लाकोटीले स्वतन्त्र उम्मेदवारी दिएका थिए । तर, बालुवाटार पुगेर देउवाले राष्ट्रिय सभामा लैजाने वचन दिएपछि उनले उम्मेदवारी निष्क्रिय पारे ।
चितवन–१ मा राष्ट्रिय योजना आयोगको उपाध्यक्ष पदबाट राजीनामा दिएर उम्मेदवार भएका हुन् पौडेल तर यो क्षेत्रमा योजना आयोगका पूर्वउपाध्यक्ष एवं कांग्रेसका युवा नेता स्वर्णिम वाग्ले पनि उम्मेदवार बन्न खोजिरहेका थिए । पौडेल उम्मेदवार भएपछि वाग्ले चितवनको चुनावी अभियानमा सरिक भएका छैनन् । तर, वाग्ले कात्तिक ३० मा पौडेलको प्रचार गर्न आउने कार्यक्रम रहेको कांग्रेस जिल्ला समितिका एक नेताले बताए ।
कांग्रेस उम्मेदवार नभएको चितवन–३ मा कांग्रेसकै दुई जना प्रभावशाली नेता स्वतन्त्र उम्मेदवार छन् । पार्टीका केन्द्रीय सदस्य रहेका दिनेश कोइराला स्वतन्त्र उठेपछि एमालेले आफ्ना रामप्रसाद न्यौपानेको उम्मेदवारी फिर्ता लिएर कोइरालालाई समर्थन गरेको छ । त्यसैगरी, पुराना नेता जगन्नाथ पौडेल पनि सोही क्षेत्रमा उम्मेदवार छन् । आफ्ना उम्मेदवार रहेको क्षेत्रमा यस्तो हुँदा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल चिन्तित देखिन्छन् । ‘कांग्रेसभित्र अलिकति जटिलता आयो भने मलाई चिन्ता लाग्छ । कांग्रेसभित्रको समस्या हल भइदिए हुन्थ्यो भन्ने हुन्छ । प्रधानमन्त्रीजी र म पटक–पटक कुरा पनि गरेका छौं । सहज वातावरण बनाउनका लागि नै प्रधानमन्त्रीजी नै आउनुभएको हो । म पनि आएको हो,’ सभामा दाहालले भने ।
उनले देशको हितका लागि यी सानातिना कुराहरू थाती राखेर या समाधान गरेर अगाडि बढ्न पनि अपिल गरे । दाहाल अघिल्लो निर्वाचनमा चितवन–३ बाटै प्रतिनिधिसभा सदस्यमा एमालेसँग चुनावी तालमेल गरेर विजयी भएका थिए । गत स्थानीय निर्वाचनमा कांग्रेससँग चुनावी तालमेल गर्दा भरतपुर महानगरमा कांग्रेसभित्र चर्को असन्तुष्टि देखा परेको थियो । यो पटक पनि चितवन–३ बाटै उठ्ने तयारीमा रहेका दाहालले अन्तिम समयमा गोरखा–२ बाट उठ्ने निर्णय लिएका थिए । दाहाल गोरखा गए पनि चितवन कांग्रेसभित्रको असन्तुष्टि रोकिएको छैन ।
विकास कोइराला ०७० को संविधानसभा सदस्य निर्वाचनमा पार्टीका तत्कालीन केन्द्रीय सभापति सुशील कोइरालाविरुद्ध चितवन–४ बाट उठेपछि कारबाहीमा परेका थिए । कारबाही फुकुवाको विषयमा पार्टीका जिल्ला सभापति र भरतपुर नै आएका केन्द्रीय सभापतिसँग दोहोरो कुराकानी नभएको कोइरालाले बताए ।
