कपिलवस्तु । शिवराज नगरपालिका–१ बनकसबासस्थित पूर्व–पश्चिम राजमार्गमा ट्रक र दुई मोटरसाइकल एकआपसमा ठोक्किँदा एक जनाको मृत्यु भएको छ भने दुई जना घाइते भएका छन्।
शनिबार बिहान करिब ९:४० बजे पूर्वबाट पश्चिमतर्फ जाँदै गरेको ना २ क ६६६ नम्बरको ट्रक, सोही दिशातर्फ गइरहेको बा ८३ प ४४८४ नम्बरको मोटरसाइकल र विपरीत दिशाबाट आउँदै गरेको रा ३ प ३५८४ नम्बरको मोटरसाइकल आपसमा ठोक्किँदा दुर्घटना भएको हो।
दुर्घटनामा रा ३ प ३५८४ नम्बरको मोटरसाइकल चालक अन्दाजी ३४ वर्षीय पुरुष गम्भीर घाइते भएका थिए। नामथर र ठेगाना नखुलेका उनलाई उपचारका लागि आधारभूत स्वास्थ्य सेवा अस्पताल, चन्द्रौटा लगिएकोमा बिहान १०:०५ बजे चिकित्सकले मृत घोषणा गरेका थिए।
त्यस्तै, बा ८३ प ४४८४ नम्बरको मोटरसाइकल चालक दाङको गढवा गाउँपालिका–२ बचैया निवासी २३ वर्षीय दिलीपकुमार यादव र पछाडि सवार गढवा गाउँपालिका–१ हेठान गाउँ निवासी २१ वर्षीय अनिल योगी घाइते भएका छन्। उनीहरूको चन्द्रौटास्थित सञ्जीवनी सामुदायिक अस्पतालमा उपचार भइरहेको छ।
दुर्घटनामा संलग्न तीनवटै सवारीसाधनसहित ट्रक चालक पर्साको पोखरिया नगरपालिका–६ सिरसिया निवासी ३२ वर्षीय ओमप्रकाश महत्तोलाई प्रहरीले नियन्त्रणमा लिएको छ।
घटनाबारे थप अनुसन्धान भइरहेको प्रहरीले जनाएको छ।
