भरतपुर, चितवन: बोष्टन ईन्टरनेशनल कलेजको, ईन्क्युवेसन विभाग, बिआईसी स्टार्टअप्सद्वारा आयोजना गरिएको ५-दिने इनोभेसन बुटक्याम्प नामक कार्यक्रम सम्पन्न भएको छ। मंसिर २४ गते आइतबार बिहान १० बजे उदघाटन समारोह सहित सुरु भएको कार्यक्रम बेलुका ४ बजे समापन भएको थियो।
५-दिने बुटक्याम्पमा २७ जना सहभागी विद्यार्थीहरुलाई उद्यम सुरु गर्न आवश्यक पर्ने ज्ञान र सीप सिकाउने उद्देश्यले विभिन्न बिज्ञहरुबाट तालिम दिईएको थियो। विशेष गरेर नवीनतम उद्यम सुरु गर्नको लागी सम्भाव्यता अध्ययन, वित्तीय परिचालन, बजार सम्भाव्यता, दिगोपन, बजारको माग, उत्पादन-बजार, व्यवसाय दर्ता एवम कानूनी प्रक्रिया, भ्याट, प्यान, बिलिङ प्रक्रियाहरू, बजार अनुसन्धान, उत्पादन प्रदर्शन, सेवा डिजाइन, लोगोहरू सिर्जना गर्ने, ब्रान्डिङ र मार्केटिङ रणनीतिहरु बनाउने, प्रभावकारी र शुद्ध भाषाको प्रयोग, पिच डेक प्रस्तुतिकरण लगायतका विषयहरुमा प्रभावकारी रुपमा तालिम दिईएको थियो।
यसरी नवप्रवर्तनीय उद्यमलाई तालिम दिनेमा बोष्टन ईन्टरनेशनल कलेजका एसोसियट डाईरेक्टर पुष्पराज अधिकारी, सिए बिकास तिवारी, मार्केटिङ् विषय प्रमुख श्रद्धा अधिकारी, अंग्रेजी विषय विज्ञ मिन प्रसाद दवाडी, बिबिए कार्यक्रम संयोजक नवीन कुमार श्रेष्ठ, बीआईसी स्टार्टअपका प्रमुख श्री प्रेमनाथ गैरे, ईसिए र पेलेस्मेन्ट प्रमुख अप्रमेय खकुरेल लगायतका प्रशिक्षकहरुले तालिममा सहजीकरण गर्नुभएको थियो। साथै कार्यक्रममा ईसीपीआई विश्वविद्यालयका प्रा. डा. राम हरि सुवेदीले पनि प्रविधि र उद्यमशीलताको विषयमा आफ्नो अनुभव साट्नुभएको थियो।
यस ५-दिने बुटक्याम्पको को नेतृत्व श्री प्रेमनाथ गैरे र कार्यक्रम सहायक श्री नितेश कुमार सिङले गरेका थिए। कार्यक्रमको पाचौँ दिनमा विद्यार्थीहरूले आफ्नो नवीन व्यवसायको अवधारणालाई अन्य सहभागीहरूका बीचमा प्रस्तुत गरेका थिए। यसरी सो कार्यक्रमबाट पाँचबटा आईडियामा काम भई चार वटा आईडियाको प्रस्तुति भएको थियो। यसै गरी कार्यक्रमको समापन गर्दै श्री प्रेमनाथ गैरेले सम्पूर्ण सहभागीलाई धन्यवाद दिए र साथै पुस ६,२०८० मा आयोजना हुने उद्यमी विकास कार्यक्रम (डेमो डे-४) मा निमन्त्रणा र सफल प्रस्तुतिको लागि शुभकामना पनि दिएका थिए।
