दाङ । दाङका विभिन्न स्थानमा प्रहरीले खोजतलास गर्ने क्रममा बेवारिसे अवस्थामा ११ थान एकनाले भरुवा बन्दुक बरामद गरेको छ।
Advertisement
विशेष सूचनाका आधारमा जिल्ला प्रहरी कार्यालय दाङ मातहतका विभिन्न प्रहरी युनिटबाट खटिएको टोलीले २०८३ भदौ २५ गते बिहान ६ बजेदेखि १० बजेसम्म जिल्लाका विभिन्न स्थानमा खोजतलास गरेको थियो। सो क्रममा बेवारिसे अवस्थामा रहेका भरुवा बन्दुक बरामद गरिएको प्रहरीले जनाएको छ।
प्रहरीका अनुसार घोराही उपमहानगरपालिका–१ शिरुखर्कस्थित राष्ट्रिय वनबाट ६ थान, बंगलाचुली गाउँपालिका–८ कएना पानीस्थित सामुदायिक वनबाट दुई थान र लमही नगरपालिका–७ स्थित नवशान्ती सामुदायिक वनबाट तीन थान एकनाले भरुवा बन्दुक बरामद गरिएको हो।
बरामद भएका सबै बन्दुक जिल्ला प्रहरी कार्यालय दाङमा ल्याइएको छ। घटनाका सम्बन्धमा थप अनुसन्धान भइरहेको प्रहरीले जनाएको छ।
