काठमाडाैँ । सुनसरीमा प्रहरीले ५६४ किलो गाँजासहित एउटा सुमो गाडी नियन्त्रणमा लिएको छ। प्रहरीका अनुसार गाडीका चालक भने फरार भएका छन्।
बर्जु गाउँपालिका–२ स्थित विराटनगर–बेलाहा सडकखण्डमा बुधबार राति करिब ११ः४० बजे इलाका प्रहरी कार्यालय सीतागञ्ज, प्रहरी चौकी अमडुवा र सशस्त्र प्रहरी बलको बीओपी अमडुवाबाट संयुक्त रूपमा खटिएको टोलीले विराटनगरबाट बेलाहातर्फ जाँदै गरेको बा १२ च १७३८ नम्बरको सुमो गाडीलाई जाँच गरेको थियो।
प्रहरी टोलीले चेकजाँच गर्ने क्रममा चालकले गाडी छाडेर फरार भएका थिए। त्यसपछि गाडीको जाँच गर्दा भित्र गाँजाजस्तो देखिने पदार्थ ५६४ किलो फेला परेको जिल्ला प्रहरी कार्यालय सुनसरीले जनाएको छ।
प्रहरीले गाँजासहित सुमो गाडी नियन्त्रणमा लिएर इलाका प्रहरी कार्यालय दुहबीमा ल्याएको छ। बरामद पदार्थको विषयमा थप अनुसन्धान भइरहेको प्रहरीले जनाएको छ।
फरार चालकको पहिचान तथा खोजी कार्यसमेत भइरहेको जिल्ला प्रहरी कार्यालय सुनसरीले जनाएको छ।
