कोशी प्रदेशका मुख्यमन्त्री केदार कार्कीले एउटा मान्छेलाई खेदेर वा ढुंगाले हानेर कोही पनि पहिचानवादी बन्न नसक्ने र पहिचान स्थापति नहुने बताउनु भएको छ। उहाँले जातजाती, भाषाभाषी, संस्कृती, रितिरिवाजको संरक्षण र सम्बद्र्धन गर्दै पहिचानलाई स्थापित गर्न सकिने भएकाले यसतर्फ लाग्न आग्रहसहित यस्तो बताउनुभएको हो।
दमक नगरपालिकाले मंगलबारदेखि सुरु गरेको लागूऔषध नियन्त्रण, रोकथाम, सचेतना र उपचार अभियान शुभारम्भ गर्दै उहाँले यस्तो बताउनुभएको हो। पहिचानवादी बताउने समूहले उहाँ कार्यक्रममा आउने क्रममा दमकको मुख्य चोकमा अवरोध सिर्जना गर्न खोजेका थिए। उहाँ सवार गाडीमा ढुंगा प्रहार हुँदा गाडीको सिसा चर्केको छ।
त्यसप्रति लक्षित गर्दै मुख्यमन्त्री कार्कीले पहिचानको नाममा यस किसिमका कार्यहरु नगर्न अनुरोध गर्नुभयो। राईलाइ राई भाषा नआउने, लिम्बुलाई लिम्बु भाषा नआउने अवस्था रहेको बताउदै यस्ता विषयमा छलफल गरौ र मिलेर अघि बढौ, उहाँले आग्रह गर्नुभयो।
‘‘लागूऔषध नियन्त्रण, रोकथाम, सचेतना र उपचार अभियान दमकबाट सुरु भएको र यो प्रदेशभर आवश्यक भएको मुख्यमन्त्रीको भनाइ थियो। संस्कारयुक्त समाज निर्माण गर्ने कुरामा हामी सधै तत्पर रहनुपर्छ र कोशी प्रदेश सरकार यसमा तत्पर छ’’, उहाँले भन्नुभयो। लागुऔषध प्रयोगकर्तालाई समाजमा पुर्नस्थापित गर्न र यसका लतमा लाग्न नदिनका लागि सबैको सहयोग आवश्यक रहेकोमा पनि उहाँले जोड दिनुभयो।
