काठमाडौं। नेपाल उद्योग परिसंघले राष्ट्रलाई आत्मनिर्भर बनाउने लक्ष्यका साथ ‘मेक इन नेपाल–स्वदेशी’ अभियानलाई प्राथमिकताका साथ अघि बढाएको छ।
परिसंघका अध्यक्ष सतिशकुमार मोरको नेतृत्वको टोलीले अर्थमन्त्री विष्णुप्रसाद पौडेललाई भेटी मेक इन नेपाल स्वदेशी अभियान बारे छलफल गरेको परिसंघले जनाएको छ ।
छलफलमा अध्यक्ष मोरले यो अभियानले स्वदेशी उत्पादन वृद्धि गर्न, व्यवसायको प्रतिस्पर्धात्मक क्षमता बढाउन र नेपाली वस्तु र सेवाको माग बढाउने लक्ष्यसहित सीएनआईले ‘मेक इन नेपाल–स्वदेशी’अभियान सुरु गरेको बताए।
उनले परिसंघको यस अभियानमा नेपाल सरकारको साथ र सहयोग हुनुपर्ने धारणा राख्दै मुलुकको औद्योगिक विस्तार, रोजगारीको सृजना एवं उत्पादन वृद्धिबाट मात्र राष्ट्रिय अर्थतन्त्रमाथि उठाउन सकिने भनाइ राखे।
यस अभियानमा सरकारले स्वामित्व बोध गरी स्वदेशी उद्योगहरुको स्थापना र उद्योगहरुलाई आत्मनिर्भर बनाउन सरकारबाट प्रभावकारी भूमिका निर्वाह गर्नु पर्ने उनको धारणा छ।
परिसंघका वरिष्ठ उपाध्यक्ष विष्णुकुमार अग्रवालले परिसंघले तयार गरेको स्वदेशी लोगोलाई नेपाल सरकारले स्वामित्व लिई तुरुन्त यसलाई कार्यान्वयनमा ल्याउन माग गरे।
यो लोगो परिसंघ, निजी क्षेत्र, सरकार विशेषको नभई देशको नै हुनुपर्ने उनको भनाइ छ। यसका लागि संयुक्त प्रयास र सहभागिता हुनुपर्ने उनले बताए।
मन्त्रीसँगको छलफलमा परिसंघका उपाध्यक्ष अनुज अग्रवालले परिसंघले तयार पारेको अवधारणाका सम्बन्धमा प्रस्तुति दिएका थिए।
उनले परिसंघले अघि सारेको अवधारणा केही महत्वकांक्षी देखिए पनि परिसंघले मुख्यगरी ४ वटा आर्थिक खम्बालाई बढी प्राथमिकतामा राखेको बताए।
विशेषगरी यस अभियानले हरेक वर्ष एक हजार उद्योग संचालनमा ल्याई वार्षिक एक लाख ५० हजार औद्योगिक रोजगारी सिर्जना गर्ने लक्ष्य लिएको अग्रवालले जानकारी दिए।
परिसंघको लक्ष्यअनुसार पाँच वर्षमा वार्षिक निर्यात ४.३ अर्ब डलर पुर्याउने र कुल गार्हस्थ उत्पादनमा सन् २०२५ सम्ममा २२ प्रतिशत र २०३० सम्ममा २६ प्रतिशत योगदान पुर्याउने उनले बताए।
कार्यक्रममा अर्थमन्त्री विष्णुप्रसाद पौडेलले परिसंघले अघि सारेको अवधारणा राम्रो रहेको बताउँदै समग्र राष्ट्रिय आवश्यकतालाई महसुस गरी यसलाई व्यवहारिक बनाउन अन्तरसंवादलाई निरन्तरता दिनु पर्ने धारणा राखे।
यस अभियानमा निजी क्षेत्र, सरकारको प्रशासनिक संयन्त्र र राजनीतिक क्षेत्रसँग पनि अन्तर संवाद गरी सम्बन्धलाई विश्वासिलो र परिपूरक बनाउनुपर्ने उनको भनाइ थियो।
आगामी बजेटमा यसलाई मूर्तरूप दिनका लागि सरकारको तर्फबाट आवश्यक सहयोग उपलब्ध गराउने उनले आश्वासन दिए।
अर्थमन्त्री पौडेलले यो अभियानमा प्रधानमन्त्री, मन्त्रीहरु, सचिवहरु र निजी क्षेत्रका अन्य संघसंस्थाहरुलाई पनि सँगै लिएर अघि बढ्नुपर्ने बताए।
छलफलमा परिसंघका तर्फबाट निवर्तमान अध्यक्ष हरिभक्त शर्मा, उपाध्यक्षहरु क्रमशः राजेशकुमार अग्रवाल र सुलभ अग्रवाल लगायतको उपस्थिति रहेको परिसंघले जनाएको छ।
