बैंक तथा वित्तीय संस्थाले निक्षेपको ब्याजदर बढाएपछि त्यसको असर सेयर बजारमा देखिएको छ । दुई महिनाअघिसम्म आठ प्रतिशत हाराहारीमा सेयर कर्जा उपलब्ध गराउँदै बैंकहरुले यति बेला निक्षेपकै ब्याजदर १० प्रतिशतमाथि पुर्याएका छन् । ब्याज दर बढाउने प्रतिस्पर्धामा देखिएका बैंक तथा वित्तीय संस्थामध्ये केहीले मुद्दति निक्षेपमा ११ प्रतिशतसम्म ब्याज दिने सूचना सार्वजनिक गरेका छन् । बचत खातातर्फको ब्याजदर पनि ६ प्रतिशत हाराहारी पुगेको छ । एनआइसी एसिया बैंकले त बचत खातामै ८ प्रतिशतसम्म ब्याज दिने भएको छ । तरलता अभाव यस्तै रहे मंसिरमा ब्याजदर अझै माथि जाने सम्भावना छ ।
लगातार बढ्दो ब्याजदरले अत्तालिएका लगानीकर्ताले सेयरको आपूर्ति बढाउँदो बजारमा पहिरो गएको हो । मंगलबार सेयर बजार ७६.९६ विन्दुले घट्न पुगेको छ । बजार सूचक नेप्से २.९७ प्रतिशतले घटेर २५११.१ मा आइपुगेको छ । यस्तै क वर्गका कम्पनीको कारोबार मापन गर्ने सेन्सेटिभ इन्डेक्स पनि २.७३ प्रतिशतले घटेर ४७१.९६ मा आइपुगेको छ । यस दिन बजार साढे १ बजे आसपास चार प्रतिशतभन्दा बढीले घटेको थियो । त्यसपछि बजार केही सम्हालिएको थियो ।
मंगलबार कारोबार भएका १३ वटा समूहमध्ये सबैको सूचकमा रातो पोतिएको छ । सबैभन्दा ओरालो लाग्नेमा वित्त समूह देखिएको छ । यो समूहको सूचक पाँच प्रतिशतभन्दा बढीले घटेको छ । त्यस्तै विकास बैंक र जलविद्युत् समूह पनि चार प्रतिशतभन्दा बढीले घटेका छन् ।
यस दिन कारोबार भएका २२१ वटा स्क्रिप्टमध्ये २०० वटाको सेयर मूल्य घटेको छ भने ११ वटाको बढेको छ । त्यस्तै १० वटाको क्लोजिङ मूल्य परिवर्तन भएन । सबैभन्दा बढी गुमाउनेमा नेपाल हाइड्रो डेभलपर्सका लगानीकर्ता परेका छन् । यस कम्पनीको सेयर मूल्य ९.७७ प्रतिशतले घटेको छ । यस दिन सबैभन्दा बढी भाउ बढ्ने कम्पनीमा महुली सामुदायिक लघुवित्त छ । यस कम्पनीको सेयर मूल्य ४.५ प्रतिशतले घटेको छ ।
