हाम्रो शरीरमा रहेको हरेक अंगको आ–आफ्नै काम हुन्छ। हाम्रो मुटु, मस्तिष्क र फोक्सोजस्तै मृगौलाले पनि समग्र स्वास्थ्य कायम राख्न काम गर्छ। मृगौलाको मुख्य काम रगत सफा गर्नु र पिसाबको माध्यमबाट शरीरका फोहोरहरू बाहिर निकाल्नु हो।
यसबाहेक, मृगौलाले रक्तचापलाई नियन्त्रण गर्न र रातो रक्त कोशिकाको निर्माणका साथै शरीरको पीएच स्तरलाई नियन्त्रण गर्न मद्दत गर्दछ। मृगौलामा कुनै किसिमको समस्या भएमा धेरै प्रकारका रोगहरुको सामना गर्नुपर्ने हुन्छ। मृगौलामा कुनै समस्या हुँदा हाम्रो शरीरले धेरै संकेत दिन थाल्छ। आउनुहोस् यी संकेतहरूको बारेमा विस्तृत जानकारी प्राप्त गर्नुहोस्।
अनुहार, खुट्टा र आँखा सुन्निनु – मृगौलाको मुख्य काम शरीरबाट विषाक्त र फोहोर पदार्थ बाहिर निकाल्नु हो। तर मिर्गौलाले राम्ररी काम गर्न छोडेपछि फोहोर पदार्थ शरीरबाट बाहिर निस्कन सक्दैन, जसका कारण शरीरका तन्तुहरूमा पानी र नुनसँगै विषाक्त पदार्थहरू जम्मा हुन थाल्छन्। शरीरमा यी सबैको मात्रा बढेपछि अनुहार, खुट्टा र आँखा वरिपरि सुन्निन थाल्छ।
अत्यधिक थकान – मिर्गौलाले रातो रक्त कोशिकाहरू पनि उत्पादन गर्दछ, जसको कमीले एनीमिया हुन सक्छ। मृगौलाले मस्तिष्क र मांसपेशीहरूमा अक्सिजन र पोषक तत्वको आपूर्तिमा पनि बाधा पुर्याउन सक्छ, जसले कारण धेरै थकान लागेको महसुस हुने गर्दछ।
पिसाबमा परिवर्तन – मृगौलामा कुनै प्रकारको समस्या भएमा पिसाबमा पनि परिवर्तन हुन्छ। सामान्यतया, मृगौलाले पिसाब उत्पादन गरेर रगत फिल्टर गर्न मद्दत गर्दछ, जसको माध्यमबाट शरीरबाट फोहोरहरू बाहिर निकालिन्छ। तर मिर्गौलाले राम्ररी काम नगर्दा पिसाब गर्दा धेरै समस्याको सामना गर्नुपर्ने हुन्छ। कसैलाई बारम्बार पिसाब लाग्ने हुन्छ भने कसैले पिसाबमा रगत देखिने, फोम आउने जस्ता समस्याको सामना गर्नुपर्ने हुन्छ ।
सास फेर्न गाह्रो हुनु- मृगौलाले हाम्रो शरीरमा तरल पदार्थलाई सन्तुलनमा राख्न काम गर्छ। मृगौलामा समस्या हुँदा फोक्सोमा तरल पदार्थ जम्मा हुन थाल्छ, जसका कारण सास फेर्न निकै समस्या हुन्छ। यस अवधिमा कतिपयलाई छाती दुख्ने समस्या पनि हुन्छ।
सुख्खा छाला- यदि तपाईको छाला धेरै सुख्खा छ र तपाईलाई चिलाउने समस्या छ भने यो मृगौला रोगको लक्षण पनि हुन सक्छ। यो रगतमा खनिज र पोषक तत्वहरूको असंतुलनको संकेत हो।
