१५ महिनामा सक्नुपर्ने साढे ४ किलोमिटर भरतपुर बाइपास सडक विस्तारको काम ६ वर्ष बितिसक्दा पनि सम्पन्न हुन सकेको छैन । वहुवर्षिय योजनामा निर्माणाधीन रहेको यो सडकका लागि चालु आर्थिक वर्षमा सरकारले बजेट नै नछुट्याएपछि सडक विस्तारको काम अझै अलपत्र हुने देखिएको छ ।
दुईवटा ठेक्कामा काम भइरहेको सो सडक निर्माणको काम हुँदै गर्दा सरकारले योजनामा नै राखेको छैन अर्थात बजेट नै विनियोजन गरेको छैन ।
सडक डिभिजन चितवनका सूचना अधिकारी इन्जिनियर चन्द्रेश्वर शाहले योजनामा नपरेपछि सडक विभागमा पत्राचार गरिएको बताए । ठेकेदार कम्पनीले बिल भुक्तानीका लागि निवेदन दिइसकेको भए पनि कार्यालयसँग उक्त सडकका लागि बजेट नहुँदा समस्या भएको उनले बताए ।
केन्द्रीय बस टर्मिनलबाट विशाल चोकसम्म २.२ किमि र विशाल चोकबाट आँपटारीसम्म २.२ किमि गरी दुई खण्डमा काम भइरहेको छ । पूरै ४.४ किमि सडक दुई लेनमा व्यवस्थित गर्न २०७३ सालमा सम्झौता भई रुख काट्ने र खन्ने काम भएको थियो । त्यही समयदेखि सडकको अवस्था विजोक छ । त्यसको एक वर्ष नबित्दै सडकलाई ४ लेन बनाउनका लागि योजना परिवर्तन गरिएको थियो । र सम्झौतामा पनि परिवर्तन गरियो ।
पहिले सम्झौता गरिएको निर्माण कम्पनी गौरी पार्वती निर्माण सेवालाई बस टर्मिनलदेखि विशालचोकसम्मको सर्भिसलेन बाहेकको काम गर्न भनियो । उक्त काम १३ करोड लागतमा १५ महिनामा सक्ने गरी २०७३ पुसमा सम्झौता गरिएको थियो । पटकपटक म्याद थप गर्दै आइएको उक्त खण्डमा मा ९७ प्रतिशत काम सम्पन्न भइसकेको छ । उक्त निर्माण कम्पनीलाई कारबाही स्वरुप हर्जना तिराइराखिएको छ । पहिलो चरणमा दैनिक ०.०५ प्रतिशत हर्जना तोकेर कारबाही सुरु गरिएको हो । निर्माण कम्पनीले १० प्रतिशतसम्म हर्जना तिरिसक्दा पनि काम नसके ठेक्का सम्झौता रद्द गरेर कालोसूचीमा राख्ने व्यवस्था खरिद ऐनमा रहेको छ ।
दोश्रो खण्ड विशालचोकदेखि आँपटारी सम्मको पूरै र पहिलो खण्डको सर्भिस लेनकोे काम रायमाझी पशुपति जेभी निर्माण कम्पनीले गर्दै छ । २०७७ साल असारमा २६ करोड लागतमा २० महिनामा काम सक्ने गरी सम्झौता भएको थियो । सम्झौता अनुसार २०७८ साल फागुनमा काम सम्पन्न भइसक्नु पर्दथ्यो । यो खण्डमा पनि पटकपटक म्याद थप भइसकेको छ । पछिल्लो पटक म्याद थप भएको अवधि मंसिरसम्म छ । हालसम्म ७० प्रतिशत मात्र काम सकिएको छ ।
अहिले बजेट नै विनियोज नगरेपछि सडकको काम अझै अलपत्र हुने देखिएको हो ।
सडक निर्माण सुस्त गतिमा हुँदा सडक ६ वर्षसम्म विजोक अवस्थामा रह्योे । यसमा मुख्य जिम्मेवार निर्माण कम्पनी नै हो । निर्माण कम्पनीका लापरबाही विरुद्ध स्थानीयले पटकपटक सडकमा धर्ना बसेर सडकको काम छिटो गर्न माग गर्दै आए । जति गरे पनि सडकको अवस्था उस्तै रहेको स्थानीयहरुले गुनासो गरेका छन् । नयाँ पिच बनेपनि सडकमा खाल्डाखुल्डी छन् । जेब्रा क्रसिङ्ग र फुटपाथ नबन्दा पैदलयात्रीले दुखः पाउने गरेका छन् । बाइपास सडक भएर यात्रा गर्ने यात्रु, सवारी चालक, व्यावसायी र स्थानीयले यस्तै गुनासो सुनाएका छन् ।
