नेपाली काँग्रेसका महामन्त्री गगनकुमार थापाले दलबिच गठबन्धन संस्कृतिको अभावमा सिङ्गो प्रणालीलाई विकृत बनाउनेतर्फ उद्त भएको बताउनुभएको छ । भरतपुरमा बुधबार आयोजित पत्रकार भेटघाट कार्यक्रममा महामन्त्री थापाले गठबन्धन संस्कृतिको अभावले नै अहिले विभिन्न समस्या आइरहेको स्पष्ट पार्नुभयो ।
“निर्वाचन अगाडिको गठबन्धन नेपालमा आफैमा गलत, संविधानको स्प्रिड विपरीत र लोकतन्त्रको स्प्रिड विपरीत छ”, उहाँले भन्नुभयो, “ सिङ्गो प्रणालीलाई विकृत बनाउने तर्फ उद्त प्रकृतिको निर्वाचन अघिको गठबन्धन रोकिनुपर्छ ।” निर्वाचन पछिको गठबन्धनलाई भने उहाँले स्वाभाविक रुपमा लिनुपर्ने धारणा राख्नुभयो ।
“निर्वाचनमा कुनै पनि दलले बहुमत नल्याए गठबन्धन बन्ने हो । तर निर्वाचन पछिको गठवन्धनका लागि पनि हामीमा गठबन्धन संस्कृतिको अभाव छ”, उहाँले भन्नुभयो ।
गठबन्धन सफल नहुनुमा नियत र कार्यगत शैलीमा नदेखिएको स्पष्टता नै समस्या भएको उहाँको निष्कर्ष छ ।
“केन्द्रमा मात्रै हैन प्रदेशमा पनि हेर्नुस् गठबन्धनमा समस्या छ । गठबन्धनका लागि चाहिने संवाद, समझदारी र स्पष्टता देखिँदैन”, उहाँले थप्नुभयो, “नेताहरुको कुराकानी मिल्यो मिल्यो । कुराकानी मिलेन मिलेन यस्तो पनि गठबन्धन हुन्छ ? सरकारको प्राथमिकता के हो ? मन्त्रीहरुको जवाफदेहिता कहा रहने हो ? कार्यक्रम कसरी बनाउने ?”
उहाँले गठबन्धनमा नीतिगत कार्यगत स्पष्टता भए समस्या नहुने तर्क पनि गर्नुभयो । काँग्रेस महासमितिको बैठक नजिँकदै गर्दा काँग्रेसले जारी राखेको समुदायमा काँग्रेस अभियानका बारेमा महामन्त्री थापालाई पत्रकारले जिज्ञासा राखेका थिए ।
“सुसशासन सेवा प्रवाहको पाटोमा ठोस परिवर्तन हुन्छ महत्त्वपूर्ण परिवर्तन हुन्छ भन्ने लागेको तर त्यो प्राप्त गर्न नसकेका कुरामा आम नागरिका ठूला गुनासा छन् । जुन सजिलै गर्न सकिने काम पनि गर्न सकिएन भन्ने गुनासा हुन्”, समुदायमा काँग्रेस अभियानका क्रममा मेची महाकाली यात्रामा नागरिकको सुझाव लिदै हिँड्नु भएका महामन्त्री थापाले थप्नुभयो, “स्रोत साधनको अभावले हुननसक्ने कार्यहरु त भएन नै स्रोत साधन बिना नै गर्न सकिने काम नहुँदा त्यसबाट भएको नैराश्यता आम नागरिकमा छ । जनताका अपेक्षा पनि छन् । सबै अनुकुल भएका बेला यो भए हुन्थ्यो भन्ने अपेक्षा आमनागरिकमा हुनु स्वभाविक नै छ ।”
उहाँले विकास निर्माणले जनतामा पारेको प्रभाव र विकास निर्माणमा भइरहेका ढिलाइले पारेका समस्या जनतालाई बुझाउन नसक्दा पनि अहिले दलहरु प्रतिको नैराश्यता बढी भएको बताउनुभयो ।
“हुलाकी सडकमा पूर्वाधार निर्माणमा यति ठूलो लगानी भएको छ यसको लाभ लिने कुरामा सबै चुकेको कुराको अनुभूति भइरहेको छ । पूर्वाधार बनेका तर समयमा पुरा हुन नसक्दा देखिएका समस्या पनि समुदायमा छ । दुई वर्षमा हुने कतिपय योजनाहरु दश÷बाह्र वर्ष पनि पुरा हुन सकेको छैन । यो ठेक्का प्रणालीकै समस्या हो भन्ने कुरा पनि जनतालाई बुझाउन सकेनौ ।” गोरखापत्र अनलाइनबाट
