धनकुटा । धनकुटाको चौबिसे गाउँपालिका–७, ठुलो ढुङ्गामा छोराले काठको चिर्पट प्रहार गर्दा ७० वर्षीय बाबुको मृत्यु भएको हो । चिर्पट प्रहार गर्ने ३२ वर्षीय छोरा युवराज लिम्बू पक्राउ परेका छन् ।
आज बिहान करिब ५ः४५ बजे युवराज लिम्बूले आफ्नै बुबा अन्दाजी ७० वर्षीय अमरध्वज लिम्बूको टाउकोमा काठको दाउरा (चिर्पट) ले प्रहार गरेका थिए । चिर्पट प्रहारबाट अमरध्वजको घटनास्थलमै मृत्यु भएको हो ।
घटनाबारे बिहान ६ः१५ बजे अस्थायी प्रहरी बिट मौनाबुधुक, धनकुटामा जानकारी प्राप्त भएपछि प्रहरी सहायक निरीक्षक जयप्रकाश रायको कमाण्डमा र इलाका प्रहरी कार्यालय राजारानीबाट प्रहरी निरीक्षक विजय थापाको कमाण्डमा प्रहरी टोली घटनास्थलमा खटिएको थियो ।
घटनाको थप अनुसन्धान, खोजतलास तथा कानुनी प्रक्रियाका लागि जिल्ला प्रहरी कार्यालय धनकुटाबाट प्रहरी उपरीक्षक नारायण रञ्जितकारको कमाण्डमा प्रहरी टोली घटनास्थलमा खटिएको थियो ।
फरार रहेका युवराजको खोजतलास गर्ने क्रममा बिहान करिब ८ः१५ बजे घरबाट करिब ५०० मिटर दक्षिणतर्फको जंगलमा लुकिछिपी बसेको अवस्थामा फेला पारी नियन्त्रणमा लिइएको हो । घटनाबारे थप अनुसन्धान भइरहेको प्रहरीले जनाएको छ ।
