काठमाडौं – मन्त्रालयको भागबन्डा मिलेपछि सरकारले मन्त्रिपरिषद विस्तारको तयारी गरेको छ । अहिले सत्तारुढ गठबन्धन दलहरु आफ्नो पार्टीबाट सरकारमा जाने मन्त्रीको टुंगो लगाउनमा व्यस्त छन् । यस्तै नेकपा माओवादी केन्द्रले सरकारमा सहभागी हुने मन्त्रीको नाम टुंगो लगाएको छ ।
बुधबार पार्टी मुख्यालय पेरिसडाँडामा बसेको स्थायी कमिटी बैठकले सरकारमा जाने मन्त्रीहरुको नाम टुंगो लगाएको हो । माओवादीबाट सरकारमा जाने चार जना मन्त्रीमा देवेन्द्र पौडेल, महेश्वर गहतराज, शशी श्रेष्ठलाई मन्त्री र बोधमाया यादव रहेका छन् ।
यसअघि माओवादी केन्द्रबाट अर्थमन्त्री जनार्दन शर्मा र ऊर्जामन्त्री पम्फा भुसाल सरकारमा सहभागी भएका छन् । गठबन्धनका अन्य दलहरु पनि अहिले आफ्नो पार्टीबाट सरकारमा जाने मन्त्रीको नाम टुंगो लगाउनमा लागिरहेका छन् ।
मंगलबार बसेको गठबन्धन दलहरुको बैठकले कांग्रेसलाई आठ मन्त्री र एक राज्यमन्त्री, माओवादी केन्द्रलाई ५ मन्त्री र एक राज्य मन्त्री, नेकपा एकीकृत समाजवादीलाई चार मन्त्री र एक राज्यमन्त्री तथा जसपालाई चार मन्त्री दिने सहमति गरेको थियो । सरकार गठन भएको लामोसमय बित्दा पनि मन्त्रिपरिषदलाई पूर्णता दिन नसकेको भन्दै प्रधानमन्त्री शेरबहादुर देउवाको आलोचना हुँदै आइरहेको छ ।
