भारतको राजधानी दिल्लीमा एक महिनाभन्दा बढी समयदेखि कुस्ती महासंघका अध्यक्ष बृजभूषण सिंहविरुद्ध हडतालमा रहेका पहलवानहरूले आफ्नो पदक गंगा नदीमा फाल्ने घोषणा गरेका छन् ।
कुस्ती महासंघका अध्यक्ष बृजभूषण शरण सिंहलाई पक्राउ गर्न माग गर्दै भारतका शीर्ष कुस्ती पहलवानहरूले जन्तर मन्तरमा विरोध प्रदर्शन गरेका छन् । तर मे २८ मा दिल्ली प्रहरीले जन्तर मन्तरबाट उनीहरूको अनशन जबरजस्ती हटायो। पहलवानले बृजभूषण सिंहमाथि यौन शोषणको आरोप लगाएका छन् ।
ओलम्पिक पदक विजेता बजरंग पुनिया, साक्षी मलिक पनि प्रदर्शन गर्ने कुस्ती खेलाडीहरू हुन्। यी बाहेक ओलम्पिकमा भारतको प्रतिनिधित्व गर्ने विनेश फोगाट पनि प्रदर्शनकी चर्चित अनुहार हुन्।
देशको नयाँ संसद भवनको उद्घाटन मे २८ मा भएको थियो । बजरंग पुनिया, साक्षी मलिक र विनेश फोगाट यस दिन नयाँ संसदमा मार्च गर्न चाहन्थे। किसान नेताहरुले पनि साथ दिएका थिए । तर प्रहरीले उनीहरुलाई र्याली गर्नबाट रोकेर हिरासतमा लिएको थियो । यसबाहेक जन्तर मन्तरमा रहेको उनीहरुको पाल जबरजस्ती हटाइयो ।
प्रहरीको यो कारबाहीको तीन दिनपछि बजरंग पुनिया र साक्षी मलिकले मंगलबार बयान जारी गरेका छन् । यसमा उनीहरूले भनेका छन्, ‘अहिले हामीलाई यी पदक चाहिँदैन किनभने यो लगाइदिएर, हामीलाई मुखौटो बनाएर यो प्रणालीले प्रचार मात्र गर्छ ।’
विज्ञप्तिमा पहलवानहरूले भनेका छन्, “मे २८ मा के भयो सबैले देखे। प्रहरीले निर्ममतापूर्वक हामीलाई गिरफ्तार गर्यो। हामीले शान्तिपूर्ण आन्दोलन गरिरहेका थियौँ। गम्भीर मुद्दामा हामीमाथि एफआइआर दर्ता गरियो। के महिला पहलवानहरूले आफूमाथि भएको यौन उत्पीडनविरुद्ध न्याय माग्दा कुनै अपराध गरेका थिए?”
“हामी महिला पहलवानहरूले यो देशमा हाम्रा लागि केही बाँकी रहेन भन्ने महसुस गरिरहेका छौँ। ओलम्पिक, विश्व च्याम्पियनसिपमा पदक जित्दाका ती पलहरू सम्झन्छौँ। आत्मसम्मानमा सम्झौता गरेर पनि किन बाँचौँ। पदक कसलाई फर्काउने भन्ने प्रश्न आयो। हाम्री राष्ट्रपतिलाई ? जो दुई किलोमिटर टाढा बसेर सबै कुरा हेरिरहनुभयो तर तर केही बोल्नुभएन ? हाम्रा प्रधानमन्त्रीलाई ? जसले हामीलाई आफ्नो घरका छोरी भनेर बोलाउनुहुन्थ्यो तर एकपटक पनि वास्ता गर्नुभएन ।”
पहलवानहरूले भने, “हामी यी पदकहरू गंगामा फ्याँक्नेछौं, किनभने उहाँ माता गंगा हुनुहुन्छ। हामी गंगालाई जति पवित्र मान्छौं, त्यति नै पवित्र काम गरेर हामीले यी पदकहरू कमाएका थियौं।”
