काठमाडौं। एयर बबल सम्झौता अनुसार पुनः सुरु गरिएको नेपाल-भारत दुईतर्फी उडानले पछिल्लो समय यात्रु माग नै थेग्न नसकेको पाइएको छ।
दुवै मुलुकको ध्वजावाहक वायुसेवाले दैनिक एक-एकवटा उडान गर्दै आएको भए पनि यसले यात्रुको माग धान्न नसक्दा यतिबेला दिल्ली-काठमाडौं उडानका लागि टिकट नै पाउन मुस्किल रहेको वायुसेवा कम्पनीहरुले जनाएका छन्।
दुवैतर्फको उडानमा अकुपेन्सी शतप्रतिशत भएपछि भारतीय ध्वजावाहक कम्पनी एयर इण्डियाले दिल्ली-काठमाडौं-दिल्ली उडानमा एक सय ८० सिट क्षमताको जहाज प्रयोगमा ल्याएको जनाएको छ। यसअघि यो रुटमा एयर इण्डियाले एक सय ६२ सिट क्षमताको जहाजबाट सेवा दिँदै आएको थियो।
माग उच्च भएपछि पछिल्लो समय दुईतर्फी हवाई यात्राका लागि कम मूल्यको वा सुरुआती भाडादरमा टिकट पाउनै मुस्किल हुँदै आएको छ। ‘अत्याधिक माग आइरहेकाले एक सातायता दिल्ली-काठमाडौंका लागि यो गन्तव्यमा उडान गर्न चाहने यात्रुले सहजै टिकट पाउन सकिरहेका छैनन्। दिनमा एउटा मात्र उडान छ तर यात्रु माग खचाखच छ,’ त्रिभुवन अन्तर्राष्ट्रिय विमानस्थलस्थित एयर इण्डिया कार्यालयका एक कर्मचारीले भने।
पछिल्लो समय गर्मी बढेसँगै भारतीय यात्रुको नेपाल आगमन पनि बढ्दा हवाई टिकट माग बढेको उनले जानकारी दिए। भारतमा गर्मी बढेसँगै दिल्ली-काठमाडौं उडानमा ७० प्रतिशत भारतीय यात्रु रहेको उनले बताए। उनका अनुसार अनुमति लिएर दुईतर्फी उडान गर्ने विदेशी यात्रुको सहभागिता भने कम्तिमा पाँच प्रतिशत रहेको छ।
यात्रु माग बढेसँगै नेपाल वायुसेवा निगमले पनि पछिल्लो समय यात्रु माग बढेसँगै काठमाडौं-दिल्ली-काठमाडौं उडानमा एयरबस ३३० ‘वाइडबडी’ जहाज प्रयोगमा ल्याउन थालेको जनाएको छ। दुईतर्फी उडानमै यात्रु माग बढेपछि निगमले आवश्यक पर्दा दुई सय ५६ सिट क्षमताको वाइड बडी जहाज प्रयोग गर्दै आएको निगमकी प्रवक्ता करिश्मा श्रेष्ठले बताइन्।
‘पछिल्लो समय दुईतर्फी उडानमा यात्रु सहभागिता उल्लेख्य छ। फुल अकुपेन्सीमा उडान संचालन भइरहेको अवस्था छ। यात्रुको माग धेरै आएकाले केही दिनअघि पनि हामीले यो गन्तव्यको उडानमा वाइडबडी जहाज प्रयोग गरेका थियौं,’श्रेष्ठले भनिन्। नेपाल-भारतबीच भएको एयर बबल सम्झौताअनुसार तीन महिनादेखि दुवै मुलुकका ध्वजावाहक कम्पनीले दैनिक एउटा उडान गर्दै आएका हुन्।
