काठमाडौं । नेपाली कांग्रेसका सभापति शेरबहादुर देउवामाथि अराजनीतिक र संसदीय चरित्रविपरीत व्यवहार देखाएको आरोप लागेको छ ।
गत जेठ ७ संविधानको धारा ७६(५)अनुसार सरकारको दाबी गर्दा देउवाले अराजनीतिक चरित्र देखाएको आरोप एमालेको ओली समूहले लगाइरहेको छ ।
प्रधानमन्त्री केपी शर्मा ओलीनिकट रहेको र उनका कदमलाई भित्रि रुपमा स्वीकार गरेको आरोप पनि उनै देउवालाई लाग्यो । कारण थियो– सरकारका विवादास्पद निर्णय र कदमप्रति मौन बस्नु ।
गत पुस ५ गते प्रतिनिधि सभा विघटन गरेको प्रधानमन्त्रीको कदमप्रति विरोध जनाएका देउवामाथि ओलीसँग साँठगाँठ रहेको आरोप लाग्यो । सोही बेला आन्दोलन गर्न पैसा छैन भन्ने सभापति देउवाको अभिव्यक्तिलाई पनि ओलीको कदमको बचाउको रुपमा लिए धेरैले ।
विवादास्पद गुठीदेखि प्रविधि विधेयक ल्याउँदासम्म सरकारको विरोध नगरेर मौन बसेको आरोप खेपेका उनीमाथि विभिन्न आरोप लाग्यो । जे ओलीले गरिरहेका छन्, त्यो देउवासँगको सहमतिमा भएको भन्नेसम्म टिप्पणी भयो । तर, यसप्रति उनले कुनै टिप्पणी र खण्डन गरेनन् । कम बोल्न बानी भएका देउवा बोली हाल्दा आक्रोशित हुने गर्छन् । यस कारण पनि उनी बोलिहाल्दैनन् ।
तर,संसद विघटन भएपछि ओली सरकारविरुद्ध बोल्न थालेका देउवा अहिले ओलीकै विकल्पमा सरकार बनाउन प्रयास गर्न पुुगे । पहिला विपक्षी भएर पनि ओली सरकारलाई समर्थन गरेको आरोप खेपेका देउवा अहिले ओलीकै विकल्पमा सरकार बनाउन खोज्दा पनि अराजनीतिक चरित्र देखाएको आरोप लागेको छ ।
विशेषगरी एमाले संसदीय दलका नेता र पार्टी अध्यक्ष ओलीको निर्णयविपरीत नेपाल समूहको हस्ताक्षर बोकेर सरकारको दाबी गरेर देउवाले संसदीय र दलीय चरित्रविपरीत कार्य गरेको आरोप खेपेका हुन् । सँगै जसपाको संसदीय र पार्टीको आधिकारिकबिना उपेन्द्र समूहको हस्ताक्षर पनि लिएर सरकारको दाबी गरेपछि देउवा अहिले आलोचित बनेका छन् ।
कुनै बेला ओली सरकारको विकल्प नखोजेको, सरकारको नेतृत्व गर्ने अवसरबाट पन्छिन खोजेको आरोप लागेको र अहिले सरकार बनाउन खोज्दा पनि आरोपै लाग्न थालेको भन्दै कांग्रेसका कार्यकर्ताहरुले भन्न थालेका छन्, ‘देउवाले जे गरे पनि सुुख छैन ।’
