काठमाडौं – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले गठबन्धन कुनै अवसरवादी गठबन्धन नभएको बताएका छन् । बिहीबार काठमाडौंमा सम्पादक तथा वरिष्ठ पत्रकारहरुसँग विपक्षी गठबन्धनले गरेको अन्तरक्रिया कार्यक्रममा प्रचण्डले सो कुरा बताएका हुन् ।
विपक्षी दलहरूबीचको गठबन्धन सैद्धान्तिक, व्यावहारिक, राजनीतिक र राष्ट्रिय भावनाको आधारलाई समेटेर जानुपर्छ भन्ने निष्कर्षसहित बनेको बताउदै प्रचण्डले यो गठबन्धन लामो समयसम्म संगसँगै जान सक्ने बताए ।
अहिलेको लडाइँ संविधान, लोकतन्त्र र राष्ट्रको हितको पक्षमा उभिने र नउभिने बीचको लडाइँ भएको पनि उनले बताए ।
उनले भने – ‘सैद्धान्तिक, व्यावहारिक, राजनीतिक र राष्ट्रिय भावनाको आधारलाई पनि समेटेर जानुपर्छ भन्ने निष्कर्षसहित गठबन्धन अगाडि गएको छ । यो गठबन्धन कुनै अवसरवादी गठबन्धन होइन । प्रधानमन्त्रीका निम्ति भएको सङ्घर्ष पनि होइन । यो संविधान, लोकतन्त्र र राष्ट्रको हितको पक्षमा उभिने र नउभिने बीचको लडाइँ हो । सिस्टम बचाउने वा नबचाउने भन्ने बीचको लडाइँ हो ।’
राष्ट्रपतिले एक पछि अर्को गर्दै संविधान, लोकतन्त्र र राष्ट्रहित विपरितका गतिविधिमा प्रधानमन्त्रीलाई साथ दिंदै आएको भन्दै प्रचण्डले अहिलेको राष्ट्रपतिमा भन्दा पहिलेका राजाहरुमा नै शान रहेको बताए ।
