काठमाडौं । पछिल्लो दशक मुलुकको राजनीतिको अग्रभागमा रहँदै आएका माओवादी केन्द्रका अध्यक्ष पुष्पकमल दाहाल प्रचण्ड आफ्नो राजनीतिक भूमिकालाई लिएर चिन्तित् बन्न थालेका छन् ।
वाम एकताको नाममा एमालेसँग पार्टी एकता गर्दा व्यहोर्नुपरेको राजनीतिक समस्या समाधानमा केपी शर्मा ओलीलाई सत्ताच्यूत गराएर शेरबहादुर देउवालाई प्रधानमन्त्री बनाउनु बाहेक अरु कुनै उपलब्धि हात पर्ने सकेको छैन ।
एमाले अध्यक्ष ओलीलाई सत्ताच्यूत र कांग्रेस सभापति देउवालाई सत्तारोहण गराउँदैमा माओवादी केन्द्र र स्वयं प्रचण्डको राजनीतिक जीवनमा पारेको सकारात्मक परीणाम शून्य छ । बरु साविक नेकपा विभाजन र एमाले विभाजन गराउन माधवकुमार नेपाललाई उकासेको आरोप भने लाग्दै आएको छ ।
एमालेसँग पार्टी एकता गर्ने तयारी साथ २०७४ सालमा निर्वाचनमा जाँदा तेस्रो दल बनेको माओवादीका अध्यक्ष प्रचण्ड आगामी निर्वाचनको सम्भावित परीणाम आंकलन गरेर अहिले सोही अनुसार राजनीतिक गतिविधि गरिरहेका छन् । जस कारण प्रचण्ड दुईवटा विषयलाई लिएर अहिले चिन्तित् देखिन्छन् ।
ओलीसँगको दरारका कारण तुहिएको कम्युनिष्ट पार्टीबीचको एकतालाई फेरि अगाडि बढाएर नेतृत्व लिने चाहनाअनुसार प्रचण्ड अघि बढेका देखिन्छन् । जस कारण एमालेबाट ओली समूह सहभागी नभए पनि माधवकुमार नेपाल समूहलाई लिने प्रचण्डको दाउ छ । सोहीअनुसार नेता नेपाललाई प्रयोग गरेका प्रचण्ड एमालेको एकताको सम्भावना जीवितै रहेकाले चिन्तित् देखिन्छन् ।
एमालेको नेपाल समूह सहभागी गराएर पूर्वमाओवादी पक्षधर र अरु कम्युनिष्ट पार्टीबीच एकता गरेर प्रचण्ड नयाँ पार्टीको नेतृत्व लिने तयारीमा छन् । तर, नेपाल समूह एमालेमै रहेमा यसको सम्भावना कम देखिएकाले प्रचण्ड छटपटाहटमा परेका छन् ।
यसैगरी ओलीलाई सत्ताच्यूत गराएर देउवालाई सत्तारोहण गराए पनि वर्तमान सरकारमाथि आफ्नो नियन्त्रण प्रचण्डले खोजेका छन् । जसका लागि उनी उच्चस्तरीय राजनीतिक संयन्त्र निर्माणको पक्षमा छन् । तर, सत्तासाझेदार दलबीच नै संयन्त्र निर्माणमा मतभेद छ । प्रधानमन्त्री देउवा पनि संयन्त्र निर्माण गर्ने पक्षमा छैनन् ।
संयन्त्रमार्फत सरकारलाई नियन्त्रणमा राख्ने र आफ्नो लक्ष्यअनुसार अघि बढ्न प्रधानमन्त्रीलाई बाध्य पार्ने प्रचण्डको दाउले सार्थकता नपाउने सम्भावना बढी देखिएकाले उनी चिन्तित् बनेका हुन् ।
