काठमाडौं । राष्ट्रपति विद्यादेवी भण्डारी र प्रधानमन्त्री केपी शर्मा ओलीबीच बिहीबार भेटवार्ता भएको छ । प्रधानमन्त्री ओली राष्ट्रपतिलाई भेट्न बिहीबार शीतल निवासमा पुगेका हुन् ।
एमालेका अध्यक्षसमेत रहेका प्रधानमन्त्री ओली पार्टीको स्थायी कमिटीको बैठक सकिएलगत्तै राष्ट्रपति भण्डारीलाई भेट्न शीतल निवास पुगेका हुन् ।
राष्ट्रपति र प्रधानमन्त्री ओलीबीच मुलुकको पछिल्लो राजनीतिक तथा समसामयिक विषयमा छलफल भएको छ । एमालेको केन्द्रीय कमिटी बैठक शुक्रबार डाकिएको र उक्त बैठकमा सहभागी हुन एमालेको असन्तुष्ट पक्ष नेपाल समूहलाई डाकिएका अध्यक्ष ओलीले राष्ट्रपति भण्डारीसँग भेटवार्ता गरेका हुन् ।
एमालेको पूर्व उपाध्यक्षसमेत रहेकी राष्ट्रपति भण्डारी एमालेमा अहिले पनि प्रभाव राख्ने बताइन्छ । मंगलबार पनि राष्ट्रपति र प्रधानमन्त्री ओलीबीच छलफल भएको थियो । र फेरि लगत्तै बिहीबार भेटवार्ता हुनुलाई महत्वको साथ हेरिएको छ ।
प्रतिनिधि सभा विघटनविरुद्ध र संविधानको धारा ७६(५)अनुसार सरकार गठन सन्दर्भमा परेका रिटमाथि सुनुवाइ अन्तिम चरणमा पुगेका बेला भएको राष्ट्रप्रमुख र सरकार प्रमुखको भेटवार्तालाई राजनीतिक वृत्तमा चासोपूर्वक हेरिएको छ ।
