सुजीता भण्डारी मृत्यु प्रकरणमा स्थानीयसँग झडप भएर स्थिति तनावग्रस्त बनेपछि चितवन प्रशासनले कर्फ्यू आदेश जारी गरेको छ ।
पूर्वी चितवनको राप्ती नगरपालिकाभित्र पर्ने राजमार्ग र आसपासका क्षेत्रमा कर्फ्यू आदेश जारी गरिएको हो ।
प्रमुख जिल्ला अधिकारी प्रेमलाल लामिछानेद्वारा जारी आदेशमा पूर्वपश्चिम राजमार्गको राप्ती नगरपालिका–१ लोथरपुलदेखि राप्ती नगरपालिका–४ डढुवासम्मको राजमार्गको दायाँबायाँ ५०० मिटरभित्र पर्ने सबै क्षेत्रमा कफ्र्यु आदेश जारी गरिएको छ ।
मंगलवार साँझ ७ः३० बजेदेखि आज बुधवार साँझ ७ः३० बजेसम्मका लागि कर्फ्यू आदेश जारी गरिएको छ ।
भण्डारीको मृत्युको विषयलाई लिएर केही व्यक्तिले राजमार्ग अवरुद्ध गर्ने, बीच सडकमा भीड जम्मा गरी हुलहुज्जत, ढुंगामुढा, सरकारी तथा निजी सम्पत्ति र संरचना तोडफोड, आगजनी तथा हुलदंगा गरी सार्वजनिक शान्ति भंग गर्न सक्ने अवस्था देखिएकाले कर्फ्यू आदेश जारी गरिएको जनाइएको छ ।
राजमार्गमा लामो दूरीका सवारीसाधन सञ्चालनबाहेक कुनै पनि व्यक्तिले आवतजावत गर्न, भेला हुन र स्थानीय प्रशासनको स्वीकृति बेगर घर बाहिर निस्कन नपाउने गरी स्थानीय प्रशासन ऐन २०२८ को दफा ६ क(१) बमोजिम कर्फ्यू आदेश जारी गरिएको छ ।
आदेश अवज्ञा गरे गराएमा त्यस्ता व्यक्तिलाई सुरक्षाकर्मीले तत्काल गिरफ्तार गरी १ महिनासम्म कैद वा जरिवाना वा दुवै सजाय हुने जारी आदेशमा उल्लेख छ ।
यसैबीच, प्रदर्शनकारी र प्रहरीबीच मंगलवार साँझ झडप हुँदा ८ जना प्रहरी घाइते भएका छन् । जिल्ला प्रहरी कार्यालय चितवनका प्रमुख प्रहरी उपरीक्षक ओम अधिकारीले दिएको जानकारी अनुसार सशस्त्र प्रहरीका प्रहरी नायब उपरीक्षकसहित ४ जना र नेपाल प्रहरीका ४ जना घाइते भएका छन् । घाइतेको उपचारको लागि भरतपुर ल्याइएको छ ।
असार ११ देखि सम्पर्कविहीन भएकी राप्ती नगरपालिका–३ की २३ वर्षीया सुजिताको शव आइतवार साँझ घरबाट करीब ४ किलोमिटर पर ब्रह्मस्थानी सामुदायिक वनको झाडीभित्र भेटिएको थियो । उनको शव मंगलवार नै परीक्षणका लागि काठमाडौं पठाइएको छ । घटनाबारे प्रहरीले अनुसन्धान गरिरहेको राससले जनाएको छ ।
(भि ग्रुप मीडिया नेटवर्क )
