काठमाडौं – नेकपा एमालेको आन्तरिक विवाद समाधानको प्रयास जारी छ । पार्टीको विवाद समाधानका लागि निस्क्रिय रहेको कार्यदललाई सक्रिय बनाएर समाधानको पहल गरिएको छ ।
केही दिनयता कार्यदलका सदस्यहरुले सहमति नजिक पुगेको र अब अन्तिम टुंगो लगाउन बाँकी रहेको बताउँदै आएका थिए । शुक्रबार पनि कार्यदलका सदस्यहरुबीच पार्टी विवाद समाधानका बिषयमा छलफल भयो । करिब ८ घण्टा लामो छलफलपछि कार्यदलले पार्टीलाई २०७५ जेठ २ को अवस्थामा फर्काउने विषयमा सहमति जुटाएको बताएको छ ।
सिंहदरबारमा बसेको उक्त बैठकपछि कार्यदलका नेताहरुले सहमति जुटेको र सहमतिलाई शनिबार अन्तिम रुप दिइने बताए । कार्यदलका सदस्य प्रदीपकुमार ज्ञवालीले पार्टीको एकतालाई सुदृढ गर्ने सन्दर्भमा सहमतिमा पुगेको बताउदै सहमतिको लागि शनिवार पनि बैठक बस्नुपर्ने बताए ।
यस्तै अर्का कार्यदलका सदस्य गोकर्ण बिष्टले पनि पार्टी विवाद सहमति नजिक पुगेर र टुंगिन मात्र बाँकी रहेको बताए ।
कार्यदलमा ओली पक्षबाट नेता सुवास नेम्वाङ, विष्णुप्रसाद पौडेल, प्रदीपकुमार ज्ञवाली, शङ्कर पोखरेल, विष्णुप्रसाद रिमाल तथा नेता माधवकुमार नेपाल पक्षबाट डा भीमबहादुर रावल, घनश्याम भुसाल, सुरेन्द्रप्रसाद पाण्डे, विष्ट र रघुजी पन्त रहेका छन् ।
यसअघि गत बुधबार राति होटेल मेरियटमा पार्टी अध्यक्ष तथा प्रधानमन्त्री केपी ओली र नेता नेपालबीच वान टू वान वार्ता भएको थियो ।
