काठमाडौं । प्रधानमन्त्री शेरबहादुर देउवाले नेपाल विद्युत प्राधिकरणको कार्यकारी निर्देशकमा कुलमान घिसिङलाई नियुक्त गर्न निर्देशन दिएका छन् ।
यसअघि प्राधिकरणको कार्यकारी प्रमुख भएर घिसिङले १८ घण्टासम्मको लोडसेडिङ हटाउनेदेखि प्राधिकरणलाई नाफा लगेको भन्दै उनको पुनर्नियुक्तिको माग गरिएको थियो । तर, तत्कालीन सरकारले पुनर्नियुक्ति नदिएपछि घिसिङले २०७७ भदौ २८ गते अवकाश पाएका थिए ।
तत पश्चात हितेन्द्रदेव शाक्यलाई प्राधिकरण प्रमुख बनाइएको थियो । अहिले प्राधिकरण घाटामा गएको भनिएका बेला फेरि देउवा सरकारले कुलमानलाई ल्याउन खोजेको हो ।
मंगलबार प्रधानमन्त्री देउवाले प्राधिकरण प्रमुखमा घिसिङलाई नियुक्त गर्न ऊर्जा, जलस्रोत तथा सिचाइँमन्त्री पम्फा भुसाललाई निर्देशन दिएका हुन् ।
ऊर्जामन्त्री भुसालले अहिलेका शाक्यको कार्यसम्पादन सन्तोषजनक नभएको भन्दै प्रधानमन्त्री देउवालाई ब्रिफिङ गरेकी थिइन् । त्यसपछि प्रधानमन्त्री देउवाले शाक्यलाई राजीनामा गर्न लगाएर घिसिङलाई नियुक्त गर्न मन्त्री भुसाललाई निर्देशन दिएका हुन् ।
