काठमाडौं । लामो समयदेखि आन्तरिक विवादमा फस्दै आएको नेकपा एमालेको एकताका लागि पछिल्लो समय उपाध्यक्ष भीम रावल सक्रिय भएका छन् ।
अर्का उपाध्यक्ष वामदेव गौतम पनि पार्टी एकताको पक्षमा रहेको बताउँदै आए पनि सोहीअनुसार क्रियाशील हुन नसकेका बेला रावल सक्रिय भएका हुन् ।
माधवकुमार नेपाल समूहमा रहेर अध्यक्ष केपी शर्मा ओलीप्रति आक्रोश पोख्दै आएका उनी पछिल्लो समय सन्तुलित र संयम व्यक्ति दिन थालेका छन् ।
संस्थापन समूह नेपाल समूहलाई पर्खेर नबस्ने भन्दै बैठक राख्न थालेको छ । तर, यसलाई रावलले रोकेका छन् । पार्टी एकताका लागि भन्दै रावलले गरेको आग्रहलाई स्वीकार्दै संस्थापन समूहले आइतबारका लागि बोलाइएको केन्द्रीय कमिटीको बैठकसमेत स्थगित गरेको छ ।
केही हप्ता अघि बालुवाटारमा अध्यक्ष ओलीसँग भेटेपछि रावल आफैँ पार्टी एकताको पक्षमा सक्रिय भएका हुन् । उनीआवद्ध कार्यदलमा गत असार २७ गते १० बुँदे सहमति भएको थियो । तर, माधवकुमार नेपालले त्यसलाई स्वीकारेका छैनन् ।
जस कारण एमालेको एकताबारे अझै आशंका र प्रश्नहरु उब्जिरहेको छ । यही क्रममा रावलले शनिबार अध्यक्ष ओली र एमाले पूर्व उपाध्यक्षसमेत रहेकी राष्ट्रपति विद्यादेवी भण्डारीलाई भेटेर पार्टी एकताका लागि पहल गरेका छन् ।
आफ्नो समूहका नेता नेपाललाई पार्टी एकताका लागि दबाब दिइरहेको र सोहीअनुसार बैठकबाट पनि निर्णय भइरहेकाले वार्तालाई जारी राख्नु पर्ने र यसका लागि वातावरण बनाउनुपर्नेमा उनले जोड दिएका छन् ।
महासचिव ईश्वर पोखरेल, उपमहासचिव विष्णु पौडेल, संसदीय दलका उपनेता सुवास नेम्वाङलगायत नेतासँगको परामर्शपछि रावलको आग्रहअनुसार अध्यक्ष ओलीले बैठक सोमबारसम्मलाई स्थगित गरेका हुन् ।
नेता रावलले पार्टी एकता विथोलिने अभिव्यक्ति नदिन र क्रियाकलाप पनि नगर्न नेता तथा कार्यकर्ताहरुसँग आग्रह पनि गरेका छन् ।
नेतृत्वप्रति उग्र र आक्रोशित अभिव्यक्ति दिँदै आएका उपाध्यक्ष रावल पछिल्लो समय शान्त रहेर पार्टी एकताको पक्षमा काम गरिरहेका छन् । उनले दुवै समूहका नेताहरुसँग भेटवार्ता गर्ने र पार्टी एकताका लागि जिम्मेवार बनाउँदै आएका छन् ।
