काठमाडौं । प्रधानमन्त्री शेरबहादुर देउवालाई अहिले आएर नेकपा एमालेका अध्यक्ष केपी शर्मा ओलीसंग सुमधुर सम्बन्ध चाहिएको छ । मंगलबार बेलुका आफ्नो विश्वासपात्र कानुनमन्त्री ज्ञानेन्द्र कार्कीलाई ओली निवास पठाएर वार्ता गर्न लगाएका थिए ।
मन्त्रीपरिषद विस्तार गर्न आलटाल गरिरहेका प्रधानमन्त्री देउवालाई अहिले केपी शर्मा ओलीको साथ चाहिएको छ । अध्यादेश ल्याएर एमाले फुटाउन सफल भएका प्रधानमन्त्री देउवालाई अब संसद सुचारु गर्न पनि केपी ओलीको साथ जरुरी छ ।
प्रधानमन्त्री शेरबहादुर देउवाले अध्यक्ष ओलीसंग सम्बन्ध सुधार नगरि संसद सुचारु गर्दा गाह्रो पर्ने आकलन गरिसकेको देउवा निकट सांसदले जनाएका छन् । संसदमा आफ्नो पक्षमा बहुमत भएपनि प्रमुख प्रतिपक्ष एमालेमा कडा विद्रोह गर्ने नेताहरुको संख्या बढी हुँदा संसदमा चर्को आलोचना खेप्नुपर्ने अवस्था बुझेर प्रधानमन्त्री शेरबहादुर देउवाले एमालेलाई हात लिन अध्यक्ष ओलीसंग सम्बन्ध सुधार्न कोशिश गरेका हुन् ।
संसद सुचारु गरेपछि देउवाको मुख्य लक्ष्य भनेको एमसीसी हो । एमसीसी जसरी पनि अनुमोदन गराउनु पर्ने दबाबमा छन् प्रधानमन्त्री देउवा । अनुमोदन गराउन आफूसंग बहुमत पुगेपनि देउवालाई एमालेको चर्को विरोध खेप्न नसक्ने देखेपछि केपी ओलीलाई नरम बनाउने कोशिशमा देउवा लागेका छन् । अध्यादेश ल्याएर एमालेको विरोध खेपिरहेका देउवा अब संसद सुचारु भएसंगे सभामुख विरुद्ध पनि एमाले चर्को रुपमा प्रस्तुत हुने बुझेका छन् । त्यो रोक्न प्रधानमन्त्री देउवा अब केपी ओलीलाई नरम बनाउन लागेका छन् ।
मंगलबार बिहान गठबन्धनका शिर्ष नेताहरुसंग छलफलमा एमसीसी संसदबाट अनुमोदन गराउनुपर्ने मौखिक निर्णय समेत भएको थियो । तर यो अनुमोदन गराउन संसद सुचारु गर्नुपर्ने र संसद सुचारु गरे अध्यादेश र सभामुख माथि एमालेका सांसदहरु चर्को रुपमा प्रस्तुत हुनेभएकाले एमालेलाई नरम बनाउनु पर्ने कुरा छलफलमा निस्किएको थियो । प्रधानमन्त्री शेरबहादुर देउवालाई जसरी पनि केपी ओलीलाई हात लिनुपर्ने सुझाव गठबन्धनका नेताहरुले दिएका थिए ।
प्रधानमन्त्री शेरबहादुर देउवा मन्त्रीपरिषद बिस्तार गर्न नसक्नुदेखि अध्यादेश जारी गरेर पार्टी फ़ुटाएको कारण बदनाम भएका छन् । अहिले हुने हरेक कार्यक्रममा एमालेका नेताहरुले यहि विषयलाई एजेण्डाको रुपमा लिएर गठबन्धनको सरकारको चर्को विरोध गरिरहेका छन् । एमालेको विरोध थेग्न गाह्रो पर्ने भएकाले प्रधानमन्त्री देउवाले केपी ओलीलाई फकाउन खोजेका हुन् ।
प्रधानमन्त्री शेरबहादुर देउवाले एमसीसी अनुमोदन गराउन सक्दो कोशिश गरिरहेका छन् । पुष्पकमल दाहाल ‘प्रचण्ड’ लाई देउवाले मनाईसकेको कारण संसदमा एमाले पार्टीले कुनै चर्को विरोध नगरुन साथै सभामुख प्रतिको नजर बद्ल्याउन सके एमसीसी अनुमोदन गराउन सहज हुने भएकाले देउवाले केपी ओलीसंग सम्बन्ध सुधार्न खोजेका हुन् ।
