रक्सौल-काठमाडौं ब्रोडगेज रेलमार्गको प्रारम्भिक सर्भेको काम ५० प्रतिशत सकिएको छ । भारत सरकारको स्वामित्वमा रहेको कोंकण रेल्वेले सर्भेको काम गरिरहेको छ । सर्भेको काम भारतकै सहयोगमा अघि बढेको हो ।
प्रारम्भिक सर्भेको काममा कोंकणले भारतीय निजी कम्पनी क्यूमैक्स टेक्नो कन्सल्टयान्ट प्रालिमार्फत गरिरहेको छ । हालसम्म आधा काम सकिएको क्युमैक्सका सर्भे इन्जिनियर विवेक शर्माले बताए । रेलमार्ग रक्सौलदेखि काठमाडौंसम्म करिब १३६ किलोमिटर लामो हुनेछ । यो रेलमार्ग पर्साको वीरगंजस्थित श्रीसिया सुक्खा बन्दरगाह भन्सार कार्यालयबाट पूर्वपट्टि भएर नेपाल प्रवेश गर्नेछ ।
रेलमार्गको रुट श्रीसिया-आठराहा-भावनीपुर-बगही-सोलखपुर-डुम्बरबाना-टागियावस्ती-निजगढ-सिंघौल-रजुवा-चिसोपानी हुँदै चोभारसम्म निर्धारण गरिएको छ । चोभार बल्खुबाट ९ किलोमिटर पूर्वमा अवस्थित छ । रेलमार्गअन्तर्गत बगही-लालपर्सा, सोलखपुर-टेढा, निजगढ-सिघौला नदी पारि, चिसोपानी, चोभार गरी करिब ८ देखि १० ठाउँमा स्टेसन स्थापना हुनेछन् ।
रेलमार्गको सर्भे ७ महिनादेखि भइरहेको शर्माले जानकारी गराए । अहिले सर्भे टोली सिमरामा बसेर काम गरिरहेको छ । मकवानपुरको हेटौंडाभन्दा पूर्वी क्षेत्रमा सर्भे जारी रहेको उनले बताए। गत नोभेम्बरदेखि पर्सा, बारा, मकवानपुर, काठमाडौंलगायत क्षेत्रमा सर्भेको काम भइरहेको छ । अबको ६ महिनाभित्र सर्भेको काम सक्ने लक्ष्य छ ।
कम्पनीले सर्भे पूरा गरी अन्तिम प्रतिवेदन कोंकणलाई बुझाउनेछ । त्यसपछि कोंकणले नेपाल सरकारलाई प्रारम्भिक चरणको प्रतिवेदन हस्तनान्तरण गर्नेछ । अनि सुरु हुनेछ विस्तृत परियोजना प्रतिवेदन (डिपिआर) तयार पार्ने काम । त्यसका लागि नेपाल र भारतबीच समझदारी पत्रमा हस्ताक्षर हुनेछ ।
करिब ७ महिनापछि डिपिआरको प्रकृया पनि शुरु हुने शर्माले बताए । डिपिआर गर्न करिब एक वर्ष लाग्ने अनुमान गरिएको छ । डिपिआर भएपछि जग्गा अधिग्रहण, मुआब्जा वितरणको काम सुरु हुनेछ । रेलमार्गको भौतिक पूर्वाधार निर्माण पनि भारत सरकारकै सहयोगमा हुनेछ ।
