घरजग्गा व्यवसायमा बढेकाे चहलपहलसँगै बैंक तथा वित्तीय संस्थाले यस क्षेत्रमा प्रवाह गरेको ऋण पनि बढेको देखिएको छ । बैंक तथा वित्तीय संस्थाले चालु आर्थिक वर्षको तीन महिनामा घरजग्गा व्यवसायमा २८ अर्बभन्दा बढी कर्जा प्रवाह गरेका छन् ।
चालु आवको साउनदेखि असोजसम्ममा बैंक तथा वित्तीय संस्थाल घरजग्गा व्यवसायमा २८ अर्ब २० करोड ६४ लाख रुपैयाँ कर्जा प्रवाह गरेको नेपाल राष्ट्रबैंकले जनाएको छ । गत आर्थिक वर्षको सोही अवधिको तुलनामा यसपटक यस्तो ऋण १२.८ प्रतिशतले वृद्धि भएको छ । गत आवको सोही अवधिमा घरजग्गा क्षेत्रमा प्रवाह भएको ऋण ९ अर्ब २८ करोड २६ लाख रुपैयाँ थियो ।
चालु आवका तीन महिनामा घरजग्गा क्षेत्रमा प्रवाह भएको कुल ऋणमध्ये व्यक्तिगत आवासतर्फ १२ अर्ब १८ करोड ३० लाख रुपैयाँ र १६ अर्ब २ करोड ३४ लाख रुपैयाँ रियल इस्टेट क्षेत्रमा प्रवाह भएको छ ।
हालसम्म बैंक तथा वित्तीय संस्थाले घरजग्गा तथा आवायीय क्षेत्रमा प्रवाह गरेको कर्जा रकम ५ खर्ब १० अर्ब ८ करोड ३९ लाख रुपैयाँ पुगेको छ । जसमा व्यक्तिगत आवासीय घर कर्जातर्फ ३ खर्ब १० अर्ब ४४ करोड ३७ लाख र रियल इस्टेट ऋणतर्फ १ खर्ब ९९ अर्ब ६४ करोड २ लाख रुपैयाँ कर्जा प्रवाह भएको छ ।
राष्ट्र बैंकका अनुसार साउनदेखि असोज मसान्तसम्ममा आवासीय रियल इस्टेटतर्फ ५ अर्ब ५५ करोड १७ लाख रुपैयाँ कर्जा प्रवाह भएको छ । यसमा एकजनालाई अधिकतम डेढ करोडसम्म प्रवाह भएको कर्जा समावेश गरिएको छ । यस्तै व्यापारिक कम्प्लेक्स तथा अपार्टमेन्टमा ३ अर्ब ९१ करोड ८५ लाख रुपैयाँ कर्जा प्रवाह भएको छ ।
व्यापारिक कम्प्लेक्स र आवासीय अपार्टमेन्ट निर्माणमा लिइएको ऋण गत वर्षको तुलनामा २०.६ प्रतिशतले वृद्धि भएको छ । त्यस्तै आय हुने व्यापारिक कम्प्लेसतर्फ तीन महिनामा ३२ करोड ४० लाख, अन्य रियल इस्टेट (प्लाटिङ, जग्गामा) ६ अर्ब २२ करोड ९२ लाख रुपैयाँ कर्जा प्रवाह भएको छ । साथै जग्गाका खरिद र प्लटिङतर्फ ६ अर्ब २२ करोड ७९ लाख रुपैयाँ, अन्यतर्फ १ अर्ब ६६ करोड र अन्यमा १ अर्ब ६५ करोड ८८ लाख रुपैयाँ कर्जा प्रवाह भएको राष्ट्रबैंकको तथ्यांकले देखाएको छ ।
