नेकपा (एकीकृत समाजवादी) का अध्यक्ष माधवकुमार नेपालले समाजवादका लागि आवश्यक समानता, न्याय, विकास र समृद्धिलाई केन्द्रबिन्दु बनाएर आफूहरुले काम गरिरहेको बताउनुभएको छ ।
प्रदेश २ को राजधानी जनकपुरधाममा बुधबार सो पार्टीको प्रदेश तथा जिल्ला कार्यालयको समुद्घाटन समारोहलाई सम्बोधन गर्दै अध्यक्ष नेपालले सो कुरा बताउनुभयो । एकीकृत समाजवादी देशमा एउटा नयाँ शत्तिको रुपमा उपस्थित भएको उहाँले दावी गर्नुभयो । पार्टीप्रति आम नेपाली जनताको समर्थन बढी रहेको र सम्बन्ध बिस्तार भइरहेको बताउनुभयो ।
कसैले भन्दैमा आफनो पार्टी कमजोर नभएको दावी गर्दै सुदूरपश्चिम प्रदेश र प्रदेश २ मा आफ्नो पार्टी ठूलो रहेको बताउनुभयो । एकीकृत समाजवादीले बागमती र प्रदेश १ मा सरकारको नेतृत्व गरिरहेको र दुई वटा प्रदेशमा पार्टींको प्रदेश प्रमुख रहेको उहाँले स्मरण गराउनुभयो । कमजोर र सानो पार्टी भएको अवस्थामा त्यस्तो हुन नसक्ने उहाँले प्रष्ट पार्नुभयो ।
उहाँले भन्नुभयो “पार्टी क्रान्तिकारी सोचकासाथ अगाडि बढेको छ, राष्ट्रियता, देशभक्ति र अधिनायकवादको विरुद्धमा लोकतन्त्रको झण्डालाई बुलन्द गर्न अघि बढेको छ ।” उहाँले आफू नेतृत्वको दल वैचारिक र सैद्धान्तीक जगमा अधारित पार्टी रहेको दावी गर्नुभयो । आगामी चुनावसम्म कुनै पार्टीसँग एकता नहुने पनि उहाँले प्रष्ट पार्नुभयो ।
एकीकृत समाजवादी आफनै बलमा चुनाव लडने बरु अन्य दलसँग सहकार्य भने हुनसक्ने उहाँले बताउनुभयो । प्रदेश २ को राजधानी जनकपुरधामलाई बनाउँदा उप्युक्त हुने उहाँले सुझाव दिनुभयो । सीताको जन्मभूमि भएकाले पनि यो ठाउँ उपयुक्त हुने उहाँले बताउनुभयो ।
विगतमा रेल संचालनका लागि कुनै तयारी नभएका कारण रेल खरिद भएर पनि संचालन हुन नसकेको भन्दै नेपालको एकमात्र रेलसेवा नेपाल रेल्वे यथाशीघ्र संचालनका लागि आफुले पहल गर्ने उहाँले बताउनु भयो । नेकपा (एकीकृत समाजवादी) धनुषाका अध्यक्ष रामचन्द्र पण्डितको अध्यक्षतामा भएको सो कार्यक्रममा प्रदेश २ का उद्योग, पर्यटन तथा वनमन्त्री शत्रुधन महतो, एकीकृत समाजवादीका उपाध्यक्ष एवम प्रदेश २ का इन्र्चाज धर्मनाथ साह, सचिव नागेन्द्र चौधरी, सचिवालय सदस्य रामचन्द्र झा, स्थायी कमिटी सदस्य श्री प्रसाद साहसहितका नेता कार्यकर्ताहरुको सहभागिता थियो ।
