काठमाडौं / न्याय सेवा आयोगको बैठकले ११ सहसचिवसहित १८५ जनाको सरुवा सिफारिस गरेको छ । आज (आइतबार) बसेको आयोगको बैठकले ११ जना सहसचिव, ४० जना उपसचिव र १३४ शाखा अधिकृत गरी कुल १८५ जनाको सरुवा गर्न सिफारिस गरेको हो ।
कामु प्रधानन्यायाधीश दीपककुमार कार्कीको अध्यक्षतामा बसेको न्याय सेवा आयोगको बैठकले ११ सहसचिवहरूको जिम्मेवारी हेरफेरसहित सरुवाका लागि सिफारिस गर्ने निणर्य गरेको हो । सरुवामा सिफारिस भएका मध्ये कानुन समूहका सहसचिव अर्जुन कुमार खड्कासहित कोशचन्द्र सुवेदी, पाराश्वर ढुङ्गाना, टिकाराम पाण्डे र धर्मराज कुइँकेल रहेका छन् ।
त्यसैगरी सरकारी वकिल समूहबाट सहन्यायाधिवक्ताहरु ईश्वरी प्रसाद बञ्जाडे, दमनसिंह बिष्ट, अच्युतमणि न्यौपाने, ज्ञान प्रसाद भुसाल, कृष्णप्रसाद पुडासैनी र पुण्य प्रसाद पाठकको सरुवा सिफारिस भएको छ । आयोगको बैठकले ४० जना उपसचिवहरूको पनि सरुवा गर्ने निणर्य गरेको छ । आयोगको बैठकले कानून समूहका ४० जना उपसचिवको एकैपटक सरुवा गर्न सिफारिस गरेको हो ।
आयोगको बैठकले १४० जना शाखा अधिकृतहरुको पनि सरुवा सिफारिस गरेको छ । आयोगको बैठकले न्याय समूहबाट ४९ जना, कानून समूहबाट १२ जना र सरकारी वकिल समूहबाट ७३ जनाको सरुवा गर्न सिफारिस गरेको हो । आयोगको बैठक कुल १३४ जना शाखा अधिकृतको सरुवा गर्न सिफारिस गरेको छ ।
त्यसैगरी आयोगको आइतबारको बैठकले सहसचिव, उपसचिव र शाखा अधिकृत गरी १४० जनालाई पदस्थापनका लागि सिफारिस गरेको छ । आयोगको बैठकले १० जना सहचिवको बढुवासहित पदस्थापनका लागि सिफारिस गरेको हो । जिल्ला न्यायाधीशमासमेत नाम निकालेका भुवन गिरीसहित १० जनालाई सहसचिवमा बढुवासहित पदस्थापनका लागि सिफारिस गरिएको छ ।
त्यसैगरी १६ जना उपसचिवलाई पनि विभिन्न स्थानमा पदस्थापनका लागि सिफारिस गरिएको छ । आन्तरिक र खुल्ला परीक्षाबाट उत्तीर्ण भएका १६ जना उपसचिवहरूलाई विभिन्न निकायमा पदस्थापनका लागि आयोगको बैठकले सिफारिस गरेको हो । त्यसगरी लोकसेवा आयोगले लिएको परीक्षामा उत्तीर्ण भएका ११४ जना शाखा अधिकृतलाई पनि विभिन्न स्थानमा पदस्थापनका लागि सिफारिस भएको छ । आयोगको बैठकले सिफारिस गरेपछि प्रधानन्यायाधीशले उनीहरुलाई नियुक्ति दिई पदस्थापन गर्नेछन् ।
आयोगको बैठकले परीक्षा उत्तीणर् गरी मौखिक परीक्षामा सहभागी भएका दुई जिल्ला न्यायाधीशको अन्तिम नतिजा समेत प्रकाशन गरेको छ । दुई जिल्ला न्यायाधीशमध्ये एक नम्बरमा भुवन गिरी र दुई नम्बरमा ओमबहादुर सोडारी सफल भएका छन् ।
हेर्नुस् सूची
प्रकाशित मिति : चैत्र ६, २०७८ आइतबार ६ : ५१ बजे
