५४ सन्तान भएको परिवारबाट चर्चित बनेका पाकिस्तानको नोस्की जिल्लाका अब्दुल मजीद मंगलको बुधबार निधन भएको छ । उनका छोरा शाह वली मङ्गलले बीबीसीलाई आफ्नो बुबाको हृदयघातका कारण मृत्यु भएको बताए । मृत्युका बेला उनी ७५ वर्षका थिए र अहिलेसम्म गाडी चलाइरहेका थिए ।
पेशाले चालक अब्दुल मजीद मंगल अफगानिस्तानसँग जोडिएको बलुचिस्तानको नोस्की जिल्लाको काली मंगल गाउँका बासिन्दा थिए। नोस्की बलुचिस्तानको राजधानी क्वेटाबाट करिब १३० किलोमिटर पूर्वमा अवस्थित छ।
सन् २०१७ को जनगणनाको अवसरमा पहिलो पटक अब्दुल मजीद र उनको परिवारको बारेमा खबर सार्वजनिक भएको थियो ।
अब्दुल मजीदले १८ वर्षको उमेरमा पहिलो विवाह गरेका थिए । उनले ६ वटा विवाह गरेका थिए जसमध्ये दुई श्रीमतीको उनको जीवनमा निधन भएको थियो ।
अब्दुल मजीदका ५४ सन्तानमध्ये १२ सन्तानको पनि उनको जीवनकालमै मृत्यु भयो भने ४२ सन्तान जीवितै छन् जसमध्ये २२ छोरा र २० छोरी छन् ।
२०१७ को जनगणना अघि, क्वेटा सहरका बासिन्दा जान मोहम्मद खिलजीले २०१७ सम्म ३६ जना बच्चाहरू जन्माएर सबैभन्दा धेरै बच्चाहरूको पिता भएको दाबी गरे।
अब्दुल मजिदका छोरा शाह वलीले बुबाको जीवनमा १२ दिदीबहिनी र दाजुभाइको मृत्यु भएको र ४२ जना छोराछोरीको पढाइ र अन्य आवश्यकता पूरा गर्न बुवाले अन्तिम साससम्म प्रयासरत रहेको बताए ।
शाह वलीले भने, ‘५४ जना बालबालिकाको आवश्यकता पूरा गर्न सजिलो काम होइन, तर हाम्रा बुवा अब्दुल मजिद मङ्गलले हाम्रो आवश्यकता पूरा गर्न जीवनभर प्रयास गर्नुभयो ।’
आफूलाई पढाउन र अन्य आवश्यकता पूरा गर्न बुबाले विभिन्न काम गरिरहेको उनले बताए । उनी भन्छन्, “उहाँसँग जाम्बाड (इरानी कमर्शियल गाडी) गाडी थियो। बुढेसकालको बाबजुद पनि मृत्यु हुनुभन्दा पाँच दिनअघिसम्म परिवारको पूर्ति गर्न गाडी चलाइरहनुभयो।”
उनले भने कि उनले आफ्नो बुबालाई आराम गरेको कहिल्यै देखेनन् तर उनले ठूलो परिवारको लागि “सधैं कडा परिश्रम” गरिरहेको देखे ।
उनले भने, ‘हामीमध्ये कोही बीए र कोही म्याट्रिक्स गरेका छौँ तर उचित रोजगारी नभएकाले बुबाको उपचार गराउन सकेनौँ ।’
देशका अन्य भागमा ठूला परिवारलाई सरकारबाट सहयोग गर्ने गरेको सुनेको शाह वलीले बताए तर यहाँ सबैभन्दा ठूलो भए पनि आफ्नो परिवार सरकारी सहयोगबाट वञ्चित रहेको बताए ।
यस वर्षको मनसुनी बाढीले आफ्नो घर भत्किएको शाह वलीले बताए ।
उनले भने, ‘हामीसँग घर बनाउन सक्ने क्षमता छैन र सरकारले अहिलेसम्म घर पुनर्निर्माणका लागि कुनै पहल नगरेकोले अन्य परिवारभन्दा हाम्रो ठूलो परिवारले बढी समस्या भोग्नुपरेको छ ।’
