हात्तीपाइलेविरुद्धको औषधि खुवाउने अभियान चलिरहेको स्वास्थ्य तथा जनसंख्या मन्त्रालयले जनाएको छ । तालिमप्राप्त स्वास्थ्यकर्मीले वडा कार्यालय, स्वास्थ्य संस्था, सामुदायिक भवन, विद्यालय, सहकारी, धार्मिकस्थल आदिमा बुथ राखेर हात्तीपाइलेविरुद्धको औषधि खुवाउने काम भइरहेको मन्त्रालयले जनाएको छ ।
मोरङ, महोत्तरी, झापा, धनुषा, रौतहट, सर्लाही, रसुवा, बारा, कपिलबस्तु, पर्वत, बाग्लुङ, लमजुङ, कैलाली, बाँके र दाङ हात्तीपाइलेविरुद्धको औषधि सेवन अभियान चलिरहेको छ ।
हात्तीपाइलेविरुद्धको औषधि कसले खानु हुन्छ र कसले हुँदैन ?
दुई वर्ष उमेर पूरा गरेका सबैले यो औषधि खानुपर्ने मन्त्रालयले जनाएको छ । दुई वर्ष नपुगेका बालबालिका, गर्भवती र सात दिनसम्मका सुत्केरी तथा सिकिस्त भई ओछ्यान परेका बिरामीले हात्तीपाइलेको औषधि खान हुँदैन ।
यी औषधिले हाम्रो शरीरमा हात्तीपाइलेको परजीवि भए नष्ट गर्नुका साथै हात्तीपाइले हुनबाट बचाउने मन्त्रालयले स्पष्ट पारेको छ ।
हात्तीपाइलेविरुद्धको औषधि नखाँदा के हुन्छ ?
हात्तीपाइले बिरुद्धको औषधि नखाँदा लामखुट्टेको टोकाईबाट सर्ने हात्तीपाइले हुन सक्छ । यो रोग लागेमा खुट्टा सुनिने, पुरुषहरूमा अण्डकोष सुनिने तथा महिलाहरूमा स्तन पनि सुनिन सक्ने मन्त्रालयलको भनाइ छ । “हाम्रो शरीरमा हात्तीपाइलेको परजीवि रहेछ भने पनि औषधि खाएपछि मर्छन् र हात्तीपाइलेका कारण शारीरिक अपांगता भएर बस्नु पर्दैन,” मन्त्रालयले भनेको छ, “यो औषधि सुरक्षित र प्रभावकारी छ ।” मन्त्रालयले यो औषधि निःशुल्क उपलब्ध गराउँदै आएको छ ।
फागुन ११ गतेबाट सुरु अभियान २५ गतेसम्म चल्नेछ ।
