प्रधानमन्त्री पुष्पकमल दाहाल प्रचण्डलाई नेपाली कांग्रेस नेता डा.शेखर कोइरालाले बालुवाटार पुगेर भेटेका छन् । प्रधानमन्त्रीकै आग्रहमा शुक्रबार डा.कोइरालले नेता मिनेन्द्र रिजालसहित प्रधानमन्त्री निवास बालुवाटारमा पुगेर भेटवार्ता गरेका हुन् ।
कांग्रेसभित्रै संस्थापन पक्ष सभापति शेरबहादुर देउवासँग सरकारमा तीन मन्त्रालयको दाबी गरेको कोइराला समूहले प्रधानमन्त्रीसँग गरिएको भेटवार्तामा सरकारलाई पूर्णता दिनेबारे छलफल भएको बताइएको छ ।
यद्यपि कांग्रेसको आन्तरिक किचलोका कारण सरकारमा पार्टीबाट मन्त्रीहरु पठाउन नसकिरहेको अवस्थामा कोइरालाको प्रधानमन्त्रीसँगको भेटवार्तालाई अर्थपूर्ण मानिएको छ ।
शुक्रबारको भेटमा सरकारमा सहभागीता र संसदमा पेश गरिएको विषयमा छलफल भएकोसंक्रमणकालीन न्यायसँग सम्बन्धि संशोधन विधेयकलाई टुंगो लगाउने विषयमा छलफल भएको कोइरालाको सचिवालयले जनाएको छ ।
प्रधानमन्त्री प्रचण्डले गत शुक्रबार मन्त्रिपरिषद् पुनर्गठन गर्दा सरकारमा सहभागी हुने मन्त्रीको नाम कोइराला समूहले नदिएपछि सरकारमा कांग्रेसले संस्थापन पक्ष सभापति शेरबहादुर देउवा पक्षका चार जनालाई मात्रै सरकारमा पठाएको छ ।
सरकारमा आठ मन्त्रालय पाएको कांग्रेसले संस्थापन इतरका नेताहरुले दाबी गरे बमोजिम मन्त्रालय संख्या नदिँदा कोइराला समूह रुष्ट भएर सरकारमा सहभागीता जनाएको छैन ।
सरकारमा सहभागी नभएर असन्तुष्ट बनेकाले उनकाे समूहलाई सरकारमा सहभागीताका लागि आग्रह गर्न प्रधानमन्त्रीले कोइरालासँग भेट गरेको प्रधानमन्त्रीका प्रमुख राजनीतिक सल्लाहकार हरिबोल गजुरेलले बताए।
केही दिनअघि कोइराला समूहकै कांग्रेस महामन्त्री गगन थापाले सरकारको कामकारबाहीप्रति असन्तुष्टि जनाउँदै सरकारको आलोचना गरेका थिए ।
सोही कारणले सशंकित रहेका प्रधानमन्त्री प्रचण्डले पार्टीको आन्तरिक समस्या समाधान गरेर छिट्टै सरकारमा सहभागीताका लागि आग्रह गरेको बताइएको छ।
