रत्ननगर । जिल्ला आयुर्वेदिक स्वास्थ्य केन्द्र रत्ननगरबाट चालु आर्थिक बर्षको ११ महिनामा ८३ हजारले सेवा लिएका छन् । सोमबार आयोजना गरिएको आयुर्वेद सेवा प्रर्बधन सम्बन्धी अन्तक्र्रिया कार्यक्रममा सार्वजनिक गरिएको तथ्याङ्क अनुसार २०७९ साउन देखि २०८० जेठ सम्म ८३ हजार ३७९ जनाले सेवा लिएका हुन ।
स्वास्थ्य केन्द्रमा उपचार गराउन आएका विरामीहरुले १० प्रकारका सेवा लिएका छन् । ५० हजार ८३३ जनाले बहिरंग चिकित्सा, ५ हजार १३७ जनाले योग सेवा, ९ हजार ६६३ जनाले पूर्वकर्मरपञ्चकर्म ६ हजार ६८० जनाले ज्येष्ठ नागरिक सेवा, एक हजार २९ जनाले स्तनपाइ आमा तथा शिशु सेवा, ६ हजार ३९४ जनाले नागरिक आरोग्य स्वास्थ्य सेवा, २ हजार ८५९ जनाले ल्याब सेवा, ४९१ जनाले अकुपन्चर सेवा, २३० जनाले फिजियोथेरापी सेवा र ६३ जनाले अल्ट्रासाउण्ड सेवा लिएको केन्द्रकी प्रमुख डाक्टर कोपिला अधिकारीले जानकारी दिइन् ।
पछिल्लो समय आयुर्वेद चिकित्साप्रति जनविश्वास बढ्दै गएको छ । रत्ननगरमै आयुर्वेद औषधि उत्पादन केन्द्र सञ्चालनमा आइसकेको छ । सरकारले ५० शय्याको आयुर्वेद अस्पताल सञ्चालनको लागि भवन निर्माण सुरु गरिसकेको छ । जिल्ला आयुर्वेद स्वास्थ्य केन्द्र बकुलहर परिसरमा निर्माणाधीन आयुर्वेद अस्पतालको काम २० प्रतिशत पूरा भएको जनाइएको प्रमुख अधिकारीले जानकारी दिइन् ।
चालु आर्थिक वर्ष २०७९र८० मा आयुर्वेद अस्पताल निर्माणका लागि रु चार करोड बजेट विनियोजन भएर काम भइरहेको उनले जानकारी दिए । बागमती प्रदेश सरकारले आगामी आव २०८०र८१ मा उक्त भवनका लागि पुनः रु तीन करोड ५० लाख बजेट विनियोजन गरिसकेको उनले बताइन् । बहुवर्षीय योजनाअन्तर्गत निर्माण भइरहेको आयुर्वेद अस्पताल तीन वर्षभित्र निर्माण सम्पन्न गर्ने लक्ष्य राखिएको छ । आयुर्वेद अस्पतालको भवन निर्माण सम्पन्न गर्नका लागि करिब रु १३ करोड बजेट आवश्यक पर्ने अनुमान गरिएको छ ।
स्वास्थ्य तथा जनसंख्या मन्त्रालयको नाममा रहेको जग्गामा आयुर्वेद अस्पतालको भवन बन्न लागेको हो । नयाँ भवनमा अस्पतालको शय्याका अतिरिक्त थेरापी शय्या, योगहल, ल्याब, एक्सरे, भिडियो एक्स–रे कक्ष रहने प्रमुख अधिकारीले जानकारी दिइन् । वडा नं १ का वडाध्यक्ष कुलप्रसाद सापकोटा प्रमुख अतिथि रहेको सो कार्यक्रममा जिल्ला आयुर्वेद स्वास्थ्य केन्द्रका अध्यक्ष राजेन्द्रकुमार श्रेष्ठले आयुर्वेद चिकित्सा कोरोनापछि प्रभावकारी बनेको बताए ।
आयुर्वेदलाई पहिला कागजमा औषधि पोका पारेर दिने भन्ने बुझिन्थ्यो उनले भने तर आयुर्वेद त्यतिमा सिमित होइन्, यसले विश्वव्यापी प्रभाव जमाइसकेको छ । केन्द्रका सुचना अधिकारी देवेन्द्र यादवले सञ्चालन गरेको सो कार्यक्रममा नेपाल पत्रकार महासंघ चितवनका कोषाध्यक्ष राजेन्द्र आचार्यले मन्तव्य राखेका थिए ।
