कोलकाता । कोलाकाताको आरजी कर मेडिकल कलेजमा प्रशिक्षार्थी डाक्टरको बलात्कारपछि हत्या भएको घटनाको विषयमा भइरहेको डाक्टरहरूको विरोध प्रदर्शनबिच अज्ञात समूहले अस्पतालमा तोडफोड गरेको छ ।
प्रशिक्षार्थी डाक्टरको शव अर्धनग्न अवस्थामा फेला परेको थियो । गत अगस्ट ९ मा आरजी कार मेडिकल कलेज तथा अस्पतालको सेमिनार हलमा प्रशिक्षार्थी चिकित्सकको अर्धनग्न शव फेला परेको थियो ।
डाक्टरको गोप्य भाग, आँखा र मुखबाट रगत बगिरहेको थियो । पोष्टमार्टम रिपोर्टमा बलात्कारपछि हत्या भएको उल्लेख छ । जसका कारण भारतभरीमा चिकित्सकहरूले निरन्तर विरोध प्रदर्शन गरिरहेका छन् ।
उता मेडिकल कलेजका आवासीय चिकित्सकहरूले अस्पताल प्रशासनले प्रमाणमा छेडछाड गरेको आरोप लगाएका छन् । उनीहरू भिडियो शेयर गर्दै भनेका छन् कि- ‘सेमिनार हलबाट २० मिटर टाढा रहेको चेस्ट विभागको कार्यालयमा तोडफोड भइरहेको छ । प्रहरीको अगाडि नै मर्मतसम्भारको नाममा प्रमाणहरू तोडफोड भइरहेको छ ।’
डाक्टरहरूले प्रदर्शन गरिरहेका बेला एक अज्ञात समूह बुधबार राति परिसरमा प्रवेश गरेर प्रदर्शन स्थल, गाडी र सार्वजनिक सम्पत्तिमा तोडफोड गरेका हुन् ।
सामाजिक सञ्जालमा भीडले बलात्कार र हत्या भएको स्थानमा पनि तोडफोड गरेको दाबी गरिएको छ । तर, कोलकाता प्रहरीले घटना भएको सेमिनार हलमा कसैले पनि तोडफोड नगरेको स्पष्ट पारेको छ ।
यसैबिच पश्चिम बंगालको सत्तारुढ दल तृणमूल कंग्रेसका राष्ट्रिय महासचिव तथा लोकसभा सांसद अभिषेक बनर्जीले अस्पतालमा गरिएको गुण्डागर्दी र बर्बरता अस्वीकार्य भएको बताए । उनले घटनामा संलग्नहरुको पहिचान गरी २४ घण्टाभित्र कारबाही सुरु गर्न माग गरे ।
यता, प्रतिपक्षी दलका नेता शुभेन्दु अधिकारीले हमला गर्नेहरू टीएमसीका गुन्डाहरू रहेको दाबी गरे ।
बीबीसी संवाददाता सलमान रविका अनुसार अज्ञात समूह अस्पतालमा प्रवेश गरेर तोडफोड सुरु गरेपछि स्थिति तनावपूर्ण बनेको थियो । यस दौरान मिडियाकर्मीलाई निशाना बनाइएको थियो ।
बीबीसी/इकागज/ रातोपाटीबाट
