बझाङ । जयपृथ्वी नगरपालिका–१० चैनपुरस्थित पानकोट पुलबाट कुकुरलाई सेती नदीमा फाल्ने एक जना महिला पक्राउ परेकी छन् ।
पुलको पश्चिम किनाराको रेलिङ पाइपमुनिबाट एक जना महिलाले कुकुरलाई धकेलेर सेती नदीमा फालेको भिडियो सामाजिक सञ्जालमा प्रसारण भएपछि घटनाबारे अनुसन्धान अघि बढाइएको थियो ।
अनुसन्धानका क्रममा कुकुरलाई पुलबाट फाल्ने महिला जिल्ला बझाङ, जयपृथ्वी नगरपालिका–३ पडेष गाउँ बस्ने ४२ वर्षीया बिमला देवी रोकाया रहेको खुलेको प्रहरीले जनाएको छ ।
प्रहरीका अनुसार रोकायालाई २०८३ असोज १ गते बेलुकी पक्राउ गरिएको हो । उनले पशुपन्छीप्रति निर्दयी व्यवहार गरेको घटनाबारे थप अनुसन्धान भइरहेको प्रहरीले जनाएको छ ।
घटनाको भिडियो सामाजिक सञ्जालमा सार्वजनिक भएपछि प्रहरीले त्यसलाई आधार बनाएर अनुसन्धान थालेको थियो । पक्राउ परेकी रोकायामाथि घटनाको प्रकृति र प्रचलित कानुनअनुसार थप अनुसन्धान तथा आवश्यक प्रक्रिया अघि बढाइने जनाइएको छ ।
