बिहीबार दिउँसो साढे चार बजे भारतको नयाँदिल्लीबाट नेपाल एयरलाइन्सको जहाज काठमाडौं आउँदै थियो। उक्त जहाजमा एक जना भारतीय उच्च अधिकारी आउन लागेको र उनको सुरक्षाका लागि व्यवस्था मिलाउन विमानस्थल प्रहरीलाई निर्देशन दिइएको थियो।
भारतीय पारवहन मन्त्री नितिन गडकरी आउने भनिएकाले विमानस्थलदेखि उनी बस्ने भनिएको द्वारिकाज होटलसम्मको सुरक्षा व्यवस्था मिलाइएको थियो। २०१४ देखि नै नरेन्द्र मोदीको सरकारमा मन्त्री रहेका गडकरी सत्तारूढ भारतीय जनता पार्टीका अध्यक्ष भइसकेका व्यक्ति हुन्।
उनी काठमाडौं आउने जानकारी परराष्ट्र मन्त्रालयमा पनि दिइएको थियो। बाबा रामदेवको पतञ्जली योग आश्रम नेपालको उद्घाटन र दुई टिभी च्यानलको लञ्च गर्ने कार्यक्रममा गडकरी सहभागी हुने बताइएको थियो।
उक्त कार्यक्रममा प्रधानमन्त्री शेरबहादुर देउवा पनि सहभागी हुँदै थिए। आयोजकले प्रधानमन्त्री देउवा र गडकरीको तस्बिर सँगै राखेर ब्यानर पनि बनाएका थिए।
अन्तिममा गडकरी नेपाल आएनन्। उनी नेपाल आउँदैनन् भन्ने जानकारी रामदेव र आचार्य बालकृष्ण काठमाडौं ओर्लँदासम्म थाहा थिएन।
बिहीबार साँझ रामदेव र बालकृष्ण विमानस्थलबाट बाहिरिएपछि विमानस्थलका एसएसपी राजेशनाथ बाँस्तोलाले भने,‘भारतीय मन्त्री पनि आउने भन्ने कुरा थियो तर उहाँ आउनुभएन।’
नेपाल आउन नसकेपछि गडकरीले शुक्रबार उक्त कार्यक्रमलाई भर्चुअली सम्बोधन गरेका छन्। पतञ्जली आश्रम र टेलिभिजन उद्घाटन कार्यक्रममा प्रधानमन्त्री देउवा, पूर्वप्रधानमन्त्रीहरू पुष्पकमल दाहाल ‘प्रचण्ड’, माधवकुमार नेपाल, नेपाल सरकारका मन्त्रीहरू र विभिन्न राजनीतिक दलका नेताहरू सहभागी थिए।
कार्यक्रमलाई सम्बोधन गर्दै भारतीय मन्त्री गडकरीले आफू नेपाल आउने कार्यक्रम भए पनि आउन नपाएको बताए।
‘केही कारणले म नेपाल आउन सकिनँ, त्यसका लागि क्षमा चाहन्छु,’ गडकरीले भने।
अन्तिम समयमा आफ्नो भ्रमण तालिका किन रद्ध भयो भन्ने कारण भने उनले खुलाएनन्।
