नेपाल सरकारले वैदेशिक रोजगारीको नयाँ गन्तव्य खोज्ने क्रममा १० हजार स्टाफ नर्सलाई बेलायत पठाउने तयारी गरेको छ । बेलायतबाट स्टाफ नर्सको माग भएपछि सरकार त्यसको तयारीमा जुटेको हो । पहिलो चरणमा २०० नर्सलाई बेलायत पठाउने गरी तयारी भएको श्रम, रोजगार तथा सामाजिक सुरक्षा मन्त्रालयले जनाएको छ ।
मन्त्रालयका सचिव सूर्यप्रसाद गौतमले बेलायत सरकारबाट १० हजार नर्सको माग आएको बताए । बेलायत सरकारले विभिन्न देशबाट एक लाख नर्स भित्र्याउने योजना अघि सारेको छ । बेलायतले पहिलो पटक विदेशी मुलुकबाट नर्सको माग गरेको हो ।
नेपालबाट नर्सलाई रोजगारीमा बेलायत पठाउने प्रक्रिया मिलाउन एउटा समिति गठन भएको छ । मन्त्रालयअन्तर्गतको रोजगार शाखाको प्रमुखको अध्यक्षतामा बेलायती दूतावास र परराष्ट्र मन्त्रालयको सहभागितामा समिति गठन भएको हो । समितिले अहिले अध्ययन गरिरहेको छ ।
मन्त्रालयले जीटुजीमार्फत नर्स पठाउने तयारी गरेको हो । बेलायत सरकारले पठाएको चिठीमा नर्सलाई शून्य लागतमा लैजाने भनिएको मन्त्रालयले जनाएको छ । औपचारिकरुपका कुन मोडलमा शून्य लागत भन्ने अझै स्पष्ट भइसकेको छैन ।
बेलायत सरकारले अनौपचारिक कुराकानीमा नेपाली नर्सलाई वार्षिक ४८ हजार पाउन्ड (नेपाली रुपैयाँ ७६ लाखभन्दा बढी) दिने जनाएको छ । तर सरकारलाई पठाएको पत्रमा तलबबारे नखुलाइएको मन्त्रालयका अधिकारीले बताएका छन् ।
सचिव गौतमले बेलायत सरकारले नेपालबाट स्टाफ नर्स लैजान चाहेकाले सम्झौताको तयारी गरिएको जानकारी दिएका छन् । ‘हामी कसरी श्रमिकमैत्री सम्झौता गर्न सकिन्छ भनेर छलफल गरिरहेका छौं’, उनले भने, ‘यसमा छिट्टै नै काम हुन्छ ।’
