बागलुङ । बागलुङको निसीखोला गाउँपालिका–१ स्थित सल्लेरी सामुदायिक वनबाट प्रहरीले लुकाइछिपाई राखिएका ७ थान भरुवा बन्दुक बरामद गरेको छ ।

Advertisement

इलाका प्रहरी कार्यालय बुर्तिबाङबाट प्रहरी निरीक्षक तिलक मानन्धरको कमाण्डमा खटिएको प्रहरी गस्ती टोलीले बुधबार बिहान सामुदायिक वन क्षेत्रमा खोजतलास गर्ने क्रममा वनमाराको झाडीमा लुकाइराखेको अवस्थामा ती बन्दुक फेला पारेको हो ।

प्रहरीका अनुसार २०८३ असोज २१ गते बिहान करिब ९ बजे फेला परेका बन्दुकमध्ये ५ थान सावुत अवस्थामा र २ थान बेसावुत अवस्थामा रहेका छन् । सबै बन्दुक एकनाले भरुवा बन्दुक रहेको प्रहरीले जनाएको छ ।

बरामद गरिएका बन्दुक कसले र के प्रयोजनका लागि त्यहाँ लुकाएर राखेको भन्ने विषयमा प्रहरीले अनुसन्धान अघि बढाएको छ । घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।