काठमाडौं। काकाकुल उपत्यकामा बसोबासी बर्सेनि थपिए। सबैतिर कहिल्यै पानी पर्याप्त छैन। मेलम्ची आयोजनाको चर्चा र निर्माण सुरु भएपछि सबैको आस यतैतिर छ।
मेलम्चीको पानी अब बल्ल उपत्यकाका घरहरुमा परीक्षण वितरणका लागि आयोजना तयार छ। थोक वितरण प्रणालीमार्फत रिजर्भ्वायरमा पानी हालिएको छ। खुमलटार, बालाजु, बाँसबारी, अनामनगर, मिनभवन, महांकालचौरको रिजर्भ्वायरका वितरण प्रणालीमा पानी पठाइएको छ।
खुमलटारबाट वितरण हुने ललितपुरको एरिया, महांकालबाट महांकालचौर, चाबहिल, न्युरोड, अनामनगरबाट अनामनगर एरिया, मिनभवनबाट बानेश्वर एरिया वितरण हुँदैछ। काठमाडौं उपत्यका खानेपानी लिमिटेड(केयुकेएल)का प्रवक्ता प्रकाश राईका अनुसार ती रिजर्भ्वायरसँग जोडिएका सबै धारामा पानी वितरण हुनेछ।
ती रिजर्भ्वायरबाट आइतबार करिब ४ करोड लिटर पानी छाड्ने तयारी छ। उनका अनुसार आइतबार करिब ८० हजार धारामा पानी पुग्नेछ।
‘करिब एक घण्टा अघि रिजर्भ्वायरमा पानी हालिएको छ,’ राईले भने, ‘ती भरिन केहीबेर समय लाग्न सक्छ। त्यसपछि पुरानै सिस्टममा पानी छाड्छौं।’ दिउँसो २ बजे पत्रकार सम्मेलन गरेर पानी वितरण सम्बन्धी जानकारी दिएपछि वितरण विधिवत हुने उनले बताए।
मेलम्चीको पानी वितरणका लागि नयाँ सिस्टम जडान गरिएको भए पनि पुरानै सिस्टमबाट पानी वितरण गर्न लागिएको छ। परीक्षण नभइसकेका कारण पुरानै सिस्टमबाट पानी वितरण गर्न लागिएको हो। विस्तारै परीक्षण गरेर नयाँ सिस्टमबाट वितरण गर्दै जाने योजना छ।
सोमबार बालाजु पोखरीबाट थप वितरण हुनेछ। त्यसपछि महाराजगञ्ज र बाँसबारीको पोखरीमा पनि वितरण हुनेछ। ‘पानी पनि एकैपटक वितरण हुने होइन। बिस्तारै परीक्षण गर्दै वितरण गर्दै जाने हो,’ केयुकेएलका प्रमुख कार्यकारी अधिकृत (सीइओ) मिलन शाक्यले भने, ‘बाहिर हल्ला गरिए जस्तो आइतबार नै सबै घरका धारमा पानी आदैनन्।’
पहिलो दुई दिन ४ करोड त्यसपछि ६.५ करोड़ र ४ दिनपछि ८.५ करोड लिटर वितरण गरिने जानकारी उनले दिए। त्यसपछि परिमाण र क्षेत्र बढाउदै लगेर बैशाखसम्म १७ करोड लिटर पानी वितरण गरिसक्ने योजना छ।
केयुकेएलका वितरण प्रणालीमा हाल करिब ३० प्रतिशत चुहावट छ। जसका कारण सिस्टमले नै नधान्ने हो कि भन्ने चिन्तामा केयुकेएलका प्राविधिकहरु छन्। त्यस्तो समस्या देखिए समाधानका लागि सबै शाखामा र्यापिड रेस्पोन्स टिम तयार छ। त्यस्तै केयुकेएल एपमा समेत चुहावटको जानकारी र कुनै गुनासो भएर दर्ता गर्न सकिन्छ। तुरुन्तै रेस्पोन्स गरिने शाक्यले दाबी गरे।
वितरण सुरु भएपछि कहीँकतै लिकेज देखिए खबर गर्न आयोजनाले सर्वसाधारणलाई आग्रह गरेको छ। लिकेज देखिएका ठाउँमा र्यापिड रेस्पोन्स टिम तुरुन्त पुग्न तयारी अवस्थामा छ। लिकेजको खबर पाउन केयुकेएलले उपभोक्तालाई आफ्ना फेसबुक पेज वा एप्स उपयोग गर्न भनेको छ। उपभोक्ताले फोटो खिचेर वा लेखेर खबर गर्न सक्नेछन्।
