बारा । निजगढ नगरपालिका–१२ रामथलीमा श्रीमतीमाथि कुटपिट गरेको आरोप लागेका एक पुरुषलाई प्रहरीले नियन्त्रणमा लिएको छ। प्रहरीले घटनाबारे थप अनुसन्धान गरिरहेको जनाएको छ।
प्रहरीका अनुसार स्थानीय ५५ वर्षीय विजय मोक्तानले घरायसी विवादका क्रममा आफ्नी ४७ वर्षीया श्रीमती सुकुमाया मोक्तानलाई लहराको टुक्राले कुटपिट गरेका थिए। कुटपिटबाट सामान्य घाइते भएकी सुकुमायाको स्थानीय मेडिकलबाट चिकित्सकलाई घरमै बोलाएर जाँच तथा औषधि उपचार गरिएको थियो।
घटनापछि सुकुमाया सोही दिन राति करिब ८ बजे खाना खाएर सुतेकी थिइन्। भोलिपल्ट बिहान करिब ४ बजे विजयले उठाउन खोज्दा उनी नउठेपछि मृत्यु भएको थाहा भएको थियो। घटनाबारे बिहान ६ः४० बजे अस्थायी प्रहरी पोष्ट रतनपुरमा जानकारी गराइएको थियो।
जानकारी प्राप्त हुनासाथ प्रहरी सहायक निरीक्षकको कमाण्डमा तथा इलाका प्रहरी कार्यालय निजगढबाट प्रहरी निरीक्षकको कमाण्डमा टोली घटनास्थल पुगेको थियो। प्रहरीले कानुनी प्रक्रिया पूरा गरी सुकुमायाको शव पोस्टमार्टमका लागि प्रादेशिक अस्पताल बारा पठाएको छ।
घटनामा संलग्न विजय मोक्तानलाई प्रहरीले नियन्त्रणमा लिएको छ। घटनाको कारण तथा मृत्युको वास्तविक अवस्थाबारे थप अनुसन्धान भइरहेको प्रहरीले जनाएको छ।
